Qazaqstannyń bank sektory Tájikstan naryǵyna qyzyǵýshylyq tanytyp otyr – Toqaev
«Biz aýyl sharýashylyǵy ónimderin óndirý, qaıta óńdeý jáne saqtaý baǵyttarynda birlesken kásiporyndar qurýdyń keleshegin qarastyrýǵa kelistik. Sol ýaǵdalastyqtardy tıimdi jáne ýaqtyly iske asyrý úshin 2025 jylǵa deıin aýyl sharýashylyǵy salasyndaǵy yntymaqtastyqty jandandyrý jónindegi jol kartasyna qol qoıyldy. Jahandyq turaqsyzdyq aıasynda atalǵan sharalar memleketterimizdiń azyq-túlik qaýipsizdigin qamtamasyz etýge mańyzdy úles qosady. Sonymen qatar, iskerlik baılanystar men ekonomıkalyq kooperatsııany keńeıtý úshin neǵurlym qolaıly jaǵdaılar jasaý qajettiligi atap ótildi. Osyǵan baılanysty óńiraralyq forýmdar formatynda ekijaqty ózara is-qımyldyń bastalýy erekshe mańyzǵa ıe», - dedi Qasym-Jomart Toqaev.
Memleket basshysy búgin eki eldiń qalalary men aýdandary arasyndaǵy baýyrlastyq baılanystardy damytý týraly qol qoıylǵanyn eske saldy.
«Eki memleket úshin de ІT-sektor men qarjy salasyndaǵy yntymaqtastyqtyń keleshegi zor. Bizdiń eldiń memlekettik qyzmetterdi tsıfrlandyrý men ІT-tehnologııalardy damytýda eleýli tájirıbesi bar. Osyǵan baılanysty, Qazaqstan Tájikstanmen keıbir damyǵan tsıfrlyq sheshimder men aqparattyq júıelerdi bólisýge daıyn.
Qazirgi tańda Qazaqstannyń bank sektory Tájikstannyń qarjy naryǵyna qyzyǵýshylyq tanytyp otyr. Osy taqyrypta kelissózder júrgizilip jatyr. Biz tájikstandyq seriktesterimizdi atalǵan baǵyttardyń barlyǵy boıynsha birlesken jobalardy iske asyrýǵa shaqyramyz», - dedi Memleket basshysy.
Aıta keteıik, keshe Memleket basshysy Qasym-Jomart Toqaev Qazaqstanǵa memlekettik saparmen kelgen Tájikstan Prezıdenti Emomalı Rahmondy elorda áýejaıynda qarsy alǵan bolatyn.
Búgin Tájikstan basshysy Emomalı Rahmonov QR Prezıdenti Qasym-Jomart Toqaevpen Aqordada ótken keńeıtilgen quramdaǵy kelissóz kezinde bıyl Qazaqstan Tájikstannyń negizgi saýda seriktesine aınalýy múmkin ekenin aıtty.
E.Rahmonnyń Astanaǵa saparynyń aıasynda 9 qujatqa qol qoıyldy.
