Qazaqstannyń bank sektory aktıvteriniń sapasyn baǵalaý aıaqtaldy
ALMATY. QazAqparat - Qazaqstannyń bank sektoryndaǵy aktıvterdiń sapasyn baǵalaý aıaqtaldy, dep habarlaıdy QazAqparat tilshisi Ulttyq bank baspasóz qyzmetine silteme jasap.
Qazaqstan Respýblıkasy Prezıdentiniń QR Úkimetiniń keńeıtilgen otyrysynyń qorytyndysy boıynsha 2019 jylǵy 30 qańtarda bergen tapsyrmasyna sáıkes QR Ulttyq Banki 2019 jylǵy 8 aıda aýqymy jaǵynan buryn-sońdy bolmaǵan, qatysýshy bankterdiń jáne tutastaı alǵanda búkil qarjy ındýstrııasynyń jaı-kúıi týraly qoljetimdi aqparattyń sapasyn jáne mańyzyn aıtarlyqtaı jaqsartýǵa múmkindik bergen bank sektory aktıvteriniń sapasyn baǵalaýdy uıymdastyryp, ótkizdi.
«Bankter aktıvteriniń jalpy kóleminiń 87%-y jáne nesıe portfeliniń 90%-y tıesili iri 14 banktiń aktıvteriniń sapasy baǵalandy. Baǵalaýdyń ashyqtyǵy men obektıvtiligin qamtamasyz etý úshin QRUB ASB-ny halyqaralyq konsýltantpen jáne táýelsiz aýdıtorlyq kompanııalarmen birlesip ótkizdi. Qazaqstannyń bank sektorynyń jaı-kúıi Eýropa Ortalyq bankiniń (EOB) ádisnamasyna sáıkes zerdelendi, ol biryńǵaı halyqaralyq sapa standarttarynyń saqtalýyna kepildik beredi jáne baǵdarlamanyń nátıjelerine halyqaralyq qoǵamdastyq tarapynan senimdi qamtamasyz etedi»,- dep habarlady Ulttyq bank.
ASB qorytyndysy boıynsha esep daıyndaldy, ol qoldanylǵan tásildiń jalpy sıpatyn, aktıvter sapasyn júıelik deńgeıde baǵalaý nátıjelerin jáne aldaǵy is qımyldardyń tizbesin qamtıdy.
Aktıvter sapasyn 2019 jylǵy 1 sáýirdegi jaǵdaı boıynsha shoǵyrlandyrylǵan deńgeıde baǵalaý nátıjelerine sáıkes (barlyq qatysýshy bankter nátıjeleriniń agregatsııasy) kapıtal tapshylyǵy baıqalmaıdy; k1 jáne k2 normatıvteri ASB baǵdarlamasynyń nátıjeleri eskerile otyryp júıelik deńgeıde artyǵymen oryndalýda.
Qazirgi kezde aktıvter sapasyn baǵalaýdyń birinshi kezeńi aıaqtaldy. 2019 jylǵy qyzmet nátıjelerin, qarjylyq jáne retteýshilik eseptilikti qalyptastyrý eskere otyryp, bankter retteýshi bergen usynymdardy negizge alyp, jan-jaqty sharalar josparlaryn ázirleıdi. Bankterdiń árqaısysy boıynsha josparlar Retteýshiniń maquldaýyna jiberiledi. Kórsetilgen protsess 2020 jylǵy 15 aqpanǵa deıin aıaqtalady. Kelisilgennen keıin sharalardyń oryndalýyn retteýshi qatań qadaǵalap otyrady.
ASB-nyń ekinshi kezeńinde banktermen júrgizilgen jumystyń qorytyndy nátıjelerin Ulttyq Bank 2020 jylǵy 28 aqpanda baǵdarlamaǵa qatysýshy bankter boıynsha beredi.
Sondaı-aq ASB qorytyndysy boıynsha táýekelge baǵdarlanǵan qadaǵalaýdy jetildirýge jáne bankterdegi bıznes protsesterdi jaqsartýǵa baǵyttalǵan júıelik sharalar jaıynda bastama kóteriledi.
Qazaqstan Respýblıkasy ekinshi deńgeıdegi bankteri aktıvteriniń sapasyn júıelik deńgeıde baǵalaý nátıjeleri boıynsha esep Ulttyq Banktiń saıtynda 2019 jylǵy 30 jeltoqsanda (búgin) saǵat 17:00-de ornalastyrylatyn bolady.
