Qazaqstannyń balalar ombýdsmeni 2 aıda qandaı jumys istelgenin aıtty
«Qazaqstan Respýblıkasynyń Bala quqyqtary jónindegi ýákili bolyp taǵaıyndalǵan 2 aıdyń ishinde ne isteldi? Biz Almaty qalasynda birinshi ret Úkimettik emes uıymdarmen birge birlesken dıalog ótkizdik. Oǵan Bilim jáne ǵylym mınıstri, Densaýlyq saqtaý mınıstri, Eńbek jáne halyqty áleýmettik qorǵaý vıtse-mınıstri qatysty. Sonymen birge, Oral qalasynda balabaqshalardyń jumysyna qatysty másele bolatyn. Bul máseleni arnaıy sol jerge baryp sheshtik. Oǵan Batys Qazaqstan oblysynyń ákimi qatysty. Balalar jedel túrde balabaqshalaryna qaıtaryldy», - dedi Sáýle Aıtpaeva Úkimettiń baspasóz ortalyǵynda ótken jıynda.
Onyń aıtýynsha, QR Bala quqyqtary jónindegi ýákildiń aınalysatyn negizgi jumystarynyń biri - azamattardyń ótinishteri men shaǵymdaryn qaraý.
«Eki aıdyń ishinde 80-ge tarta ótinim kelip tústi. Ótinimderdi paraqtap otyryp, qandaı oıǵa kelýge bolady? Birinshiden, otbasylyq qarym-qatynas pen alımenttik mindettemelerdiń, áleýmettik jáne turǵyn-úılik quqyqtyq, balalardy tárbıeleý máseleleri ótkir bolyp otyrǵanyn baıqaýǵa bolady. Shaǵymdardy qaraı otyryp, QR Bala quqyqtary jónindegi ýákili retinde men qazirgi qoldanystaǵy zańnamanyń talaptaryn ótinim berýshilerge túsindire otyryp, memlekettik organdardy, mınıstrlikterdi másleni sheshýge aralastyryp nemese bılik ókilderiniń áreket etýi nemese etpeýiniń sebebin túsindirip beremin. Jergilikti atqarýshy organdar kúndelikti ómir kórsetip otyrǵandaı azamattardyń zańnamalyq quqyqtary men múddelerin túsindirip bermeıdi», - deıdi Sáýle Aıtpaeva.
Eske sala ketsek, Parlament Senatynyń depýtaty, QR Bala quqyqtary jónindegi ýákili Sáýle Aıtpaeva eki aı buryn Qazaqstan Respýblıkasyndaǵy Bala quqyqtary jónindegi ýákil qyzmetine taǵaıyndalǵan bolatyn.
