Qazaqstannyń BAQ týraly ulttyq zańnamasy halyqaralyq talaptarǵa saı, áıtse de jetildirýdi qajet etedi
ANA. 20 mamyr. QazAqparat /Qanat Mámetqazyuly/ -Búgin L. Gýmılev atyndaǵy Eýrazııa ulttyq ýnıversıtetinde «Buqaralyq aqparat quraldary týraly halyqaralyq standarttar jáne ulttyq zańnama» taqyrybynda konferentsııa bolyp ótti.
Shara barysynda Qazaqstan krımınologııalyq qaýymdastyǵy bir top sarapshylardyń qatysýymen ulttyq BAQ týraly zańnamanyń halyqaralyq standarttarǵa sáıkestigine qatysty júrgizgen tekserýleriniń qorytyndylaryn tanystyrdy. Atalǵan joba Eýroodaq tarapynan bólingen grant negizinde júzege asyp otyr.
«Biz bul rette Qazaqstannyń ulttyq zańnamasy jetilip kele jatqandyǵyn jáne memleket BAQ pen sóz bostandyǵy týraly máseleler qamtylǵan halyqaralyq aktilerge qosylatynyn atap ótkimiz keledi», - dedi qazaqstandyq sarapshy Serikqalı Tynybekov jýrnalısterge bergen suhbatynda. Onyń aıtýynsha, zertteý barysynda otandyq zańnamamen qarastyrylǵan jala jabýǵa qatysty qylmystyq jaza berý týraly másele biraz daý týdyrǵan. «Toqtala ketetin jaıt, Eýroodaqtyń 47 memleketiniń 28-inde qylmystyq jaýapkershiliktiń osy túri qarastyrylǵan. Bul jerde másele BAQ-ty paıdalana otyryp, belgili bir azamattyń ary men namysyna nuqsan keltiriletin ótirik jala jabý týraly bolyp otyr», - dedi sarapshy. Onyń pikirinshe, Qazaqstannyń ulttyq zańnamasynda bundaı norma saqtalýy shart. Al jalpylama alǵanda, jıynǵa qatysýshylar eldiń zańnamasy halyqaralyq talaptarǵa sáıkes keledi degen qorytyndy shyǵaryp otyr. Dese de, zańnamany odan ári jetildire túsý úshin konferentsııa qorytyndysy boıynsha birqatar usynymdar ázirlenetini belgili boldy. Bundaı usynymdar Parlament depýtattaryna, múddeli mınıstrlikter men memlekettik organdarǵa joldanatyn bolady.
