Qazaqstannyń Azııa keńesindegi tóraǵalyǵy aıasyndaǵy Úshinshi jol kartasyna qoı qoıyldy
Qujatqa QR Syrtqy ister mınıstriniń birinshi orynbasary Shahrat Nuryshev pen Azııadaǵy ózara yqpaldastyq jáne senim sharalary keńesi hatshylyǵynyń atqarýshy dırektory Qaırat Sarybaı qol qoıdy.
«Búgin biz Qazaqstan Respýblıkasynyń Azııadaǵy ózara yqpaldastyq jáne senim sharalary keńesindegi tóraǵalyǵy aıasyndaǵy Úshinshi jol kartasyna qol qoıǵaly jatyrmyz. Osy joly qol qoıylatyn Jol kartasy tóraǵalyqtyń 2022 jyly iske asyrylatyn is-sharalarǵa arnalǵan.
Byltyr Nur-Sultan qalasynda Syrtqy ister mınıstrleriniń keńesi ótti. Bıyl bizdiń josparymyz boıynsha osy Azııa keńesiniń Nur-Sultan qalasyndaǵy Sammıti óteıin dep jatyr. Sondyqtan da búgingi Jol kartasyna negizinen engizilgen suraqtardyń bári – osy Sammıtke daıyndyq. Bul Sammıttiń eń basty maqsaty – qazir forým bolyp tabylatyn Azııa keńesin tolyqqandy halyqaralyq uıymǵa aınaldyrý», - dedi.
Onyń aıtýyna qaraǵanda, atalmysh Jol kartasynda naqty is-sharalar qamtylǵan.
«Neshe túrli forýmdar, neshe túrli keńesterdiń otyrystary, Sammıt kezinde qol qoıýǵa shyǵarylatyn qujattardyń daıyndyǵy boıynsha neshe túrli máseleler qamtylǵan.
Azııa keńesiniń aıasynda Іskerlik keńes, Jastar keńesi, Aqylmandar keńesi sııaqty birneshe keńes bar. Mınıstrlik deńgeıindegi, sarapshylar deńgeıindegi turaqty kezdesýler bar. Sondyqtan bul Jol kartasy bizdiń jumysymyzdyń eń negizgi qujaty bolyp esepteledi», - dedi Syrtqy ister mınıstriniń birinshi orynbasary.
Qol qoıý rásiminen keıin Azııa keńesi hatshylyǵynyń atqarýshy dırektory Qaırat Sarybaı Qazaqstan astanasynda ótýi josparlanǵan Sammıttiń maqsatyna keńirek toqtaldy.
«Jańa ǵana qol qoıylǵan Jol kartasy – bizdiń Azııa keńesi hatshylyǵynyń jumysyn retteıtin qujat. Azııa keńesine tóraǵalyq jasap jatqan Qazaqstan Respýblıkasynyń basymdyqtaryn biz iske qalaı asyratynymyzdy, ózimizdiń qandaı sharalardy atqaratynymyzdy, qoıylǵan maqsattarǵa qalaı jetetinimizdi anyqtaıdy. Sondyqtan bul qujat biz úshin asa mańyzdy», - deıdi ol.
Keńes hatshylyǵynyń atqarýshy dırektory keńesti halyqaralyq uıymǵa tarnsformatsııalaý bir kúndik jumys emes ekenin aıtady.
«Qazaqstannyń usynysy boıynsha bul másele birneshe ret kóterilgen bolatyn. Azııa keńesin tolyqqandy halyqaralyq uıymǵa aınaldyrý bir kúnniń máselesi emes. Alaıda bul transformatsııa bastalý kerek.
2021 jyly tóraǵalyq bul transformatsııany qalaı atqaratynyn keńeske múshe 27 memleketke taratqan bolatyn. Jalpy qaǵıdalarǵa eshbir memlekettiń narazylyǵy joq. Sondyqtan bul baǵyttaǵy taldaý jáne talqylaý úrdisi bıyl jalǵasady. Nur-Sultan qalasynda ótetin VI Sammıt kezinde múshe memleketter Azııa keńesiniń halyqaralyq uıymǵa aınalý transformatsııasy bastalǵanyn arııalaıdy degen úmit bar», - dedi Qaırat Sarybaı.
