Qazaqstannyń azamattyq zańnamasyna Brıtan quqyǵynyń elementterin engizý kózdeledi
ASTANA. QazAqparat - Qazaqstannyń azamattyq zańnamasyna Brıtan quqyǵynyń elementterin engizý kózdeledi. Bul týraly búgin Májilisite azamattyq zańnamany jetildirýge baǵyttalǵan zań jobasyn tanystyrǵan Ádilet mınıstriniń orynbasary Záýresh Baımoldına málim etti.
«Biz zań jobasynda quqyqtyq saıasat tujyrymdamasyndaǵy baǵyttar men mindetterdi qamtýǵa tyrystyq. Alaıda, Qazaqstanda azamattyq zańnamany jetildirýdi qarastyratyn basqa da máseleler barshylyq. Atap aıtqanda, Brıtan quqyǵy men onyń jekelegen elementterin bizdiń ulttyq zańnamaǵa qoldaný týraly mindetter qoıylyp otyr. Bundaı quqyq ásirese Qazaqstannyń Dúnıejúzilik saýda uıymyna enýine, elimizdiń ekonomıkalyq baılanystar kókjıegin keńeıtýine baılanysty meılinshe ózekti bolyp tabylady», - dedi Z. Baımoldına.
Onyń aıtýynsha, búgingi kúni Ádilet mınıstriniń buıryǵymen arnaıy jumys toby qurylyp, ol top Brıtan quqyǵynyń elementterin engizý máselesimen aınalysýǵa kirisken.
«Biz usynyp otyrǵan zań jobasynda zańdy tulǵalar ınstıtýtynyń múmkindikterin ashýǵa baǵyttalǵan birqatar normalardy qamtyp otyrmyz. Alaıda, osy ınstıtýttyń qyzmetin odan ári jetildirý úshin biz qoldanystaǵy Azamattyq kodekste joq, buryn bizde bolmaǵan elementterdi engizýdi kózdeımiz. Bul mindettemelik quqyqtar ınstıtýtyna da qatysty másele. Sondyqtan da, biz osy baǵytta Anglııa zańnamasyna, Ekonomıkalyq damý jáne yntymaqtastyq uıymy elderiniń zańnamasyna tereń taldaýlar jasaıtyn bolamyz», dedi Z. Baımoldına.
