Qazaqstannyń Azamattyq alıansy memlekettik organdardyń birqatar fýnktsııalaryn úkimettik emes uıymdarǵa júkteýdi usynýda

ASTANA. 1 qarasha. QazAqparat - Qazaqstannyń Azamattyq alıansy memlekettik organdardyń birqatar fýnktsııalaryn úkimettik emes uıymdarǵa júkteýdi usynýda. Bul týraly búgin Qazaqstannyń Azamattyq alıansy uıymynyń basshysy Nurlan Erimbetov QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda málim etti.

"Ishki ister mınıstrligi qoǵamdyq qaýipsizdikti saqtaýy, qylmyskerlerdi ustaýy tıis. Al qylmystyń aldyn alý, balalarmen jumys, qylmysqa barýy múmkin tulǵalarmen jumys, salaýatty ómir saltyn nasıhattaý azamattyq qoǵamnyń fýnktsııasyna berilýi tıis. Osyndaı mańyzdy jumystar árbir salada da bar jáne ol qyzmetti qoǵamdyq uıymdar atqarýy qajet dep esepteımin. Mınıstrlikterdiń qoldary jete bermeıtin mindetterdi bizge berińizder. Biz onymen aınalysatyn adamdardy da, ádisterdi de tabamyz", - dep atap ótti N.Erimbetov.

Onyń aıtýynsha, Qazaqstannyń Azamattyq alıansy atalmysh saýaldy jaqynda ótetin Azamattyq forýmda talqylaıdy.

"Mınıstrlikterdiń tikeleı ózderiniń jumystary men maqsattary bar. Biraq óner bolsyn, sport bolsyn qosymsha jumystardy júrgizýde biz nege belsendilik kórsetpeımiz? Azamattyq uıymdardy halyqtyń ózin-ózi qamtyǵan bóligine nege baǵyttamaımyz? Bul - óte úlken jumys", - dep túıdi sózin ol.

Aıta keteıik, «Qazaqstannyń Azamattyq alıansy» elimizdiń barlyq óńirinde 1000-ǵa jýyq ÚEU basyn qosyp otyrǵan iri úkimettik emes uıym bolyp tabylady.