Qazaqstannyń áıelder uıymdary alıansy búkilhalyqtyq referendým ótkizý jónindegi bastamaǵa qoldaýlaryn bildirdi

Bul týraly atalmysh uıym búgin Almatyda ótken baspasóz máslıhatynda málim etti.

Atalmysh birlestik quramyna kiretin 18 áıelder úkimettik emes uıymdary jıynda elimizdegi áıelder uıymdary men barlyq áıelderdi respýblıkalyq yntaly toptyń bastama usynysyn qoldaýǵa shaqyrdy.

«Qazaqstannyń áıelder uıymdary alıansy» respýblıkalyq qoǵamdyq birlestiginiń prezıdenti Raýshan Sarsembaeva: «Elimizde genderlik saıasat tıimdi júrgizilip, áıel quqyǵyn qorǵaý, otbasylyq-demografııalyq máselelerdiń sheshý joldary demokratııalyq qoǵamda óz jalǵasyn taýyp keledi. Qoǵamdyq sananyń kertartpalyǵyn jeńý úrdisi de búgingi tańda saıasattyń yqpalymen júzege asyrylyp jatyr. Bul jónindegi naqty is-sharalar álem boıynsha da, elimizdiń damý júıesinde de durys jolǵa qoıylǵan. Búginde áıelderdiń múddeleri men quqyqtaryn qorǵaý jáne taǵy da basqa máselelermen QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa aınalysyp keledi jáne elimizde «2006-2016 jyldarǵa arnalǵan Qazaqstan Respýblıkasy Genderlik teńdik strategııasy» men «Áıelder men erlerdiń teń quqyqtary men teń múmkindikteri týraly» zańy jumys istep jatyr. Elbasy árqashan bizderdi, áıelder uıymdaryn qoldaıdy jáne qoldap keledi. El Prezıdenti áıel róliniń artýyna kóńil bólip, genderlik saıasatqa erekshe nazar aýdarady. Biz elimizdegi shynymen de biregeı ult Kóshbasshysy dep Qazaqstan Respýblıkasynyń Tuńǵysh Prezıdenti Nursultan Ábishuly Nazarbaevty bilemiz», - dedi.

Ol sonymen qatar Qazaqstanda áıel azamattardyń kásipkerlikpen aınalysýyna jáne memleketti baqarý isterine qatysýyna barlyq jaǵdaı jasalǵandyǵyn atap ótti.

«Qazaqstannyń áıelder uıymdary alıansy» zańdy tulǵalar birlestigi bolyp tabylady. Oǵan eldiń 18 áıelder úkimettik emes uıymdary engen.