Qazaqstannyń avıatsııalyq bıligi dron ıelerimen ózara is-qımyldy nyǵaıtý úshin telegram arnany iske qosty
Bul rette Telegram-daǵy arnany QR IIDM Azamattyq avıatsııa komıteti Qazaqstannyń avıatsııalyq ákimshiligimen birlesip, ashqanyn aıta keteıik, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.
Dronekazakhstan ushqyshsyz ushý apparatyn qoldanyp júrgen barlyq azamatqa paıdaly bolady dep kútilip otyr. Óıtkeni munda qajetti málimetter men túsiniktemeler, sondaı-aq osy apparattardyń qoldanylýyn retteıtin normatıvtik-quqyqtyq aktilerdegi ózgerister týraly aqparat jarııalanyp turady. Budan basqa elimizdiń avıatsııalyq bılik oryndary bul arqyly dron ıelerin ushýǵa tyıym salynǵan aımaqtar boıynsha úılestirip, óńirlerde ótkiziletin aýqymdy is-sharalardyń josparyna baılanysty ýaqytsha shekteýler týraly qulaqtandyrypdandyryp otyrady.
Ushqyshsyz ushatyn apparattardy qoldanatyn azamattar kókeıkesti suraqtardy joldap, quzyrly organdardyń tarapynan qajetti jaýapty ala alatynyn aıta ketý kerek.
«Qymbatty dostar, biz atalǵan arnany ushqyshsyz ushatyn apparattarmen jumys isteıtin jeke jáne zańdy tulǵalarmen ózara is-qımyl jasaý úshin quryp otyrmyz. Ózekti máselelerdi belsendi talqylaýǵa qatysýlaryńyzdy suraımyz. Munda barlyq suraqty qoıa alasyzdar. Osy jerde QR IIDM AAK men «Qazaqstannyń avıatsııalyq ákimshiligi» AQ qyzmetkerleri kez kelgen saýalǵa jaýap berýge daıyn. Biz mindetti túrde jaýap berip, kómek kórsetemiz», - dedi arnanyń avtorlary.
Sondaı-aq jobanyń jetekshileri jańa arnanyń jumysynda qandaı da bir kemshilikter týyndaǵan jaǵdaıda oǵan túsinistikpen qaraýdy suraıdy.
Qazirdiń ózinde atalǵan arnada ushýǵa tyıym salynǵan aımaqtardyń tizimi, UUA-ryn Qazaqstannyń áýe keńistiginde paıdalanýdy rettep, esepke qoıý men NQA-degi olarǵa qatysty ózekti erejeler ornalastyrylǵan. Sonymen qatar maqsatty aýdıtorııaǵa «Qazaeronavıgatsııa» RMK saıtyn paıdalana otyryp, ınternet pen v3.0 telefon baılanysy arqyly ushý josparlaryn usynýdyń tártibi túsindirildi.
