Qazaqstannyń avıatsııa ákimshiligi «Air Transport News Corporate Award» korporatıvtik syılyǵyn aldy

ASTANA. QazAqparat - IKAO Keńesiniń músheleri, IKAO Hatshylyǵy, túrli memleketterdiń avıatsııalyq bılik organdary, IATA, CANSO, ACI World, TIACA, iPADIS jáne iri halyqaralyq áýe tasymaldaýshylary 2023 jyly Monrealda (Kanada) ótken «Jahandyq baılanys máseleleri» áýe kóligi sımpozıýmyna jáne áýe kóligi marapattaryn tapsyrý rásimine qatysty.

Bul týraly QazAqparat QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap habarlaıdy.

Shara barysynda Qazaqstannyń avıatsııalyq ákimshiligi «Air Transport News Corporate Award» syılyǵyn aldy, bul Halyqaralyq avıatsııa qaýymdastyǵy tarapynan Qazaqstandaǵy azamattyq avıatsııany basqarýdyń jańa modeline kóshý boıynsha júrgizilgen jumystardy moıyndaý bolyp tabylady.

Marapat Qazaqstannyń Kanadadaǵy Elshisi Aqylbek Kamaldınovke tabystaldy.

Qazaqstannyń avıatsııalyq ákimshiligi-úsh jyl buryn halyqaralyq ozyq tájirıbelerge negizdelgen tıimdi avıatsııalyq organ bolý maqsatymen qurylǵan jas retteýshi organ.

Ótken jyldyń sáýir aıynan bastap bas dırektor Katalın Radý jáne QR IIDM Azamattyq avıatsııa komıtetiniń tóraǵasy Talǵat Lastaevtyń atynan jańa basshylyq Qazaqstannyń avıatsııa ákimshiliginiń qadaǵalaý múmkindikterin nyǵaıta aldy, ony túrli halyqaralyq aýdıtter men baǵalaýlar moıyndady.

Qazaqstannyń avıatsııa ákimshiligi men IIDM Azamattyq avıatsııa komıteti Qazaqstannyń óńirlik jáne halyqaralyq deńgeılerde avıatsııalyq qatysýyn odan ári damytýdy jáne keńeıtýdi jalǵastyrady.

2023 jylǵy jeńimpazdar arasynda IKAO prezıdenti Salvatore Shıachıtano, ERA bas dırektory Monserrat Barrıga, IATA basqarýshylar keńesiniń tóraǵasy Mehmet Nane, Gaıana azamattyq avıatsııa basqarmasynyń bas dırektory Egbert Fıld, TIACA, Wizz Air, iGA Stambýl áýejaıy, SkyTeam marapattaldy.

ATN korporatıvtik marapaty salanyń halyqaralyq deńgeıde tanylýynyń eń joǵary deńgeıin bildiredi jáne Qazaqstannyń avıatsııalyq bılik oryndaryn elimizdiń azamattyq avıatsııa salasynyń ıgiligi úshin ózderiniń órshil maqsattaryna jetýge jáne óz áleýetin tolyq iske asyrýǵa yntalandyratyn bolady.