Qazaqstannyń aýyl sharýashylyǵy salasyndaǵy bolashaǵy zor - Bernd Hallıer
ALMATY. QazAqparat - Almatyda ótip jatqan «Almaty invest-2016» halyqaralyq forýmynyń qatysýshylary megapolıske ınvestıtsııa tartý máselesin qyzý talqylaýda, dep habarlaıdy QazAqparat tilshisi forým alańynan.
Jıynda «QazAqparat» tilshisine suhbat bergen Eýropa saýda ınstıtýty, Eýropa reteıl akademııasynyń jetekshisi Brend Hallıer atalǵan forýmnyń Qazaqstan ekonomıkasyn tartymdy etip kórsetýde zor úles qosatynyn aıtty.
- Brend myrza, Almatyda ótip jatqan forým siz úshin nesimen paıdaly?
- Bul Almaty úshin óte mańyzdy forým. Sebebi, kópshilik ınvestıtsııa Astanaǵa qaraı tartylady dep oılaıdy. Forýmǵa qatysýshylar munda kelgennen keıin, Almatyda ınvestıtsııa salýǵa bolatyn nysandar bar ekenine kóz jetkizdi.
Forýmnan keıin men uıymdastyrýshylarmen onlaın-rejimde baılanys ornatamyn. Kelesi forýmǵa Germanııadan 20-30 qatysýshy ákelemin.
-Qazaqstanda qaı salaǵa ınvestıtsııa salý tıimdi dep oılaısyz?
- Logıstıka, tamaq ónerkásibi. Sonymen qatar, organıkalyq ónimder óndirý, tabıǵı, ekologııalyq taza tamaq óndirisi, alma, kúrish, taǵy basqa da Qazaqstan bere alatyn aýyl sharýashylyǵy ónerkásibi ınvestorlar úshin tartymdy bolmaq.
Menińshe, aýyl sharýashylyǵy salasynda Qazaqstannyń bolashaǵy zor, sondyqtan, aýyl sharýashylyǵy jobalaryn damytýǵa mán berý kerek. Sizderdiń elderińizdiń álemdegi iri agromádenı klasterge aınalýǵa áleýeti jeterlik.
-Qazaqstan qandaı brendterimen tanymal?
- Qazaqstan týraly Astana, Baıqońyrdy biledi. Budan da tanymal bola túsý úshin shetel BAQ-taryna jıi jarııalaný kerek.
Aıta keteıik, Bernd Hallıer forýmnyń paneldik talqylaýynda Qazaqstanda Halyqaralyq ýnıversıtet qurýǵa múddeli ekenin jetkizdi. Ol JOO Qazaqstan, Tájikstan, Qyrǵyzstan týraly baıandamalar jasap, naqty aqparattar usynýmen aınalyspaq.
Búgin Almatyda Ritz-Carlton qonaq úıinde Almaty qalasy ákimdiginiń uıymdastyrýymen «Almaty invest-2016» forýmy ótip jatyr.
Jalpy forýmǵa bedeldi saıasatkerler, álemdik jáne otandyq bıznes kóshbasshylary, ınvestıtsııalyq korporatsııalardyń basshylary, qarjy ınstıtýttary men halyqaralyq uıymdardan barlyǵy 500-ge tarta joǵarǵy qyzmetterdegi mamandar keldi.
Forýmda saýda jáne qyzmet kórsetý salasy, tamaq ónerkásibi, iskerlik týrızm, memlekettik-jekemenshik áriptestik jáne ındýstrıaldyq damý sekildi 5 basym baǵyt boıynsha Almaty qalasynyń ınvestıtsııalyq múmkindikteri talqylandy.
