Qazaqstannyń aýyl sharýashylyǵy ónimderi 72 elge eksporttalady
«Mınıstrlik eldiń epızootııalyq jáne fıtosanıtarııalyq salaýattylyǵyn qamtamasyz etý jáne qazaqstandyq aýyl sharýashylyǵy ónimderin ótkizetin eksporttyq naryqtar ashý boıynsha júıeli jumys júrgizýde. «Ortalyq-oblys-aýdan» qaǵıdaty boıynsha veterınarııalyq baqylaý vertıkaly zańnamalyq deńgeıde qalpyna keltirildi, bul baqylaýǵa jatatyn ónimder qozǵalysyn qadaǵalaýdy kúsheıtýge jáne ónimniń «egistik alqabynan ústelge deıin» qadaǵalanýyn qamtamasyz etýge septigin tıgizedi«, - dedi mınıstr Ortalyq kommýnıkatsııalar qyzmetindegi onlaın kezdesýde.
Onyń atap ótýinshe, ótken jyly Qytaımen shoshqa etine, sút ónimderine, júnge qoıylatyn veterınarııalyq talaptar, zyǵyr tuqymyna, bıdaı unyna, qurama jemge qoıylatyn fıtosanıtarııalyq talaptar kelisildi. Osydan birneshe jyl buryn Qytaı aýsyl men nodýlıarly dermatıt boıynsha qoıǵan shekteýlerdi alyp tastady. Bul óz kezeginde qazaqstandyq et ónimderi úshin Qytaı naryǵyna múmkindik berdi. Sondaı-aq, soıysqa arnalǵan tiri iri qara maldy, sıyr etin, usaq maldyń janama ónimderin, taǵamdyq jumyrtqany Iranǵa eksporttaýǵa qoıylatyn veterınarııalyq talaptar kelisildi.
»Nátıjesinde qazaqstandyq agroónerkásiptik keshen ónimderin eksporttaý kólemi Qytaıǵa 50,5 paıyzǵa, Parsy shyǵanaǵy elderine 3,2 esege, Ortalyq Azııa elderine 7,4, Eýrazııalyq ekonomıkalyq odaq elderine 8,2 paıyzǵa ulǵaıdy. Jalpy, ótken jyly qazaqstandyq ónimder álemniń 72 eline eksporttaldy. Bul rette, ótken jyldyń qorytyndysy boıynsha agroónerkásiptik keshen ónimderiniń eksporty 6,4 paıyzǵa artyp, 3,3 mlrd AQSh dollaryna jetti«,- dedi Saparhan Omarov.
