Qazaqstannyń aýyl sharýashylyǵy maqsatyndaǵy jerdiń 1,2 paıyzy ǵana jeke menshikte - E. Dosaev

ASTANA. QazAqparat - Qazaqstandaǵy aýyl sharýashylyǵy maqsatyndaǵy jerdiń 1,2 paıyzy ǵana jeke menshik enshisinde. Búgin Parlament Májilisiniń jalpy otyrysynda QR Ulttyq ekonomıka mınıstri Erbolat Dosaev osylaı málim etti. Eske sala keteıik, otyrysta «QR Jer kodeksine ózgerister men tolyqtyrýlar engizý týraly» zań jobasy birinshi oqylymda talqylanǵan bolatyn. Qujat Elbasynyń «100 naqty qadam» Ult josparyn júzege asyrýǵa baǵyttalady.

«Búgingi kúni jer tolyqqandy naryqtyq qural bolmaı otyr, sonymen qatar, aýyl sharýashylyǵy salasyndaǵy ótimdi aktıv te emes. Sonymen birge, aýyl sharýashylyǵy jerleriniń negizgi úlesi 97,4 mln gektardyń 98,8 paıyzy uzaqmerzimdi jaldaýda bolsa, tek 1,2 paıyzy ǵana jeke menshikte. Osylaısha, memlekettik qosalqy aýyl sharýashylyǵy jerleri naryq aınalymyna engizilmegen túrinde tıimsiz jaǵdaıda qalyp otyr», - deıdi mınıstr Erbolat Dosaev.

Onyń aıtýynsha, búgingi tańda jerdi jalǵa alýshylardyń basym bóligi ony adal nıetpen paıdalanyp jatqan joq. Utymdy paıdalaný boıynsha talaptar da oryndalmaı keledi. «Máselen, jerdi óńdeý boıynsha zamanaýı tehnologııalar engizilmeıdi. Buǵan jerdi jaldaý qunynyń tómendigi de áser etedi. Osyǵan baılanysty zań jobasynyń negizgi maqsaty aýyl sharýashylyǵy úshin paıdalanylatyn jerlerdi utymdy jáne tıimdi paıdalanýdy qamtamsyz etý bolyp tabylady. Bul rette jerlerdi jeke menshikke tabystaýdyń jańa tetikterin engizý qarastyrylady», - dedi Ulttyq ekonomıka mınıstri.