Qazaqstannyń Aýǵanstanǵa negizgi kúsh-jigeri ekonomıkalyq kómek arqyly qoldaý kórsetý bolyp tabylady - SІM basshysy E. Qazyhanov
ASTANA. 27 mamyr. QazAqparat /Qanat Mámetqazyuly/ - Qazaqstannyń Aýǵanstanǵa negizgi kúsh-jigeri ekonomıkalyq kómek arqyly qoldaý kórsetý bolyp tabylady.
Búgin QR Cyrtqy ister mınıstrliginde ótken QR Parlamenti Májilisi Halyqaralyq ister, qorǵanys jáne qaýipsizdik komıtetiniń kóshpeli otyrysy barysynda syrtqy saıasat vedomstvosynyń basshysy Erjan Qazyhanov osylaı málimdedi.
«Biz soǵysty jaqtamaımyz. Bizdiń negizgi kúsh-jigerimiz Aýǵanstanǵa ekonomıkalyq kómekter arqyly qoldaý bolyp tabylady. Joldardy, kópirlerdi, aýrýhanalardy salýǵa járdem beremiz, aýǵan eline gýmanıtarlyq kómek jiberemiz. Sonymen qatar, Qazaqstan óziniń qarajaty esebinen aýǵan jastaryn oqytýdy qolǵa alýda. Osy maqsatqa 50 mln. dollardan astam qarajat bólinip otyr», - dedi E. Qazyhanov. Mınıstrdiń aıtýynsha, osy baǵyttaǵy negizgi basymdyqtardyń biri Aýǵanstannan keletin esirtki óndirisi men aınalymyna qarsy kúres. «Aýǵan soǵysy aıaqtalatynyna senemin, bul ómirbaqı jalǵaspaýy kerek. Sondyqtan da, Qazaqstan osynaý kóp azap shekken halyqtyń keleshektegi beıbit ómirin qalyptastyrýǵa belsendi atsalysatyn bolady», - dedi syrtqy saıasat vedomstvosynyń basshysy. Sonymen birge, mınıstr Qazaqstannyń ulttar qaýymdastyǵynyń belsendi ári jaýapty múshesi retinde aýǵan elindegi jaǵdaıdyń turaqtalýyn qoldaıtyndyǵyn jetkizdi. «Sondaı-aq, biz soǵys arqyly aýǵan problemasy sheshimin tappaıtyndyǵyn aıtqymyz keledi. Buǵan barlyq múddeli taraptyń erik-jigeri jáne eldiń áleýmettik-ekonomıkalyq saýyǵýyna joǵary deńgeıde halyqaralyq járdem kerek. Aýǵan halqy óz eliniń turaqtylyǵyn qamtamasyz etetin jaǵdaıǵa jetken kezde, óńirdegi qaýipsizdik te kúsheıe túsedi», dedi mınıstr.
