Qazaqstannyń Áýe kúshteri jańartylǵan ushaqtarmen tolyqty

BALQASh. QazAqparat - Balqash qalasyndaǵy Qazaqstan Áýe qorǵanysy kúshteriniń oqý-avıatsııalyq ortalyǵyna L-39 oqý-jaýyngerlik ushaqtary keldi. Memlekettik qorǵanystyq tapsyrys sharty sheńberinde ótken jyldyń sońynda olar óndirýshi zaýytqa jiberildi. Onda kúrdeli jóndeý jumystary júrgizilip, jańǵyrtýdan ótti. Bul týraly QazAqparat QR Qorǵanys mınıstrligine silteme jasap habarlaıdy.

Modernızatsııa barysynda ushaqtarǵa jańa tsıfrlyq avıonıka, katapýlttaý júıeleri, baılanys jáne obektıvti baqylaý quraldary ornatyldy.

L-39 kýrsanttardy kúndiz jáne túnde qarapaıym jáne kúrdeli meteojaǵdaılarda, ushý tehnıkasyna bastapqy oqytýǵa, jaýyngerlik qoldaný elementterin oqytýǵa, sondaı-aq oqý oryndary men áskerı bólimderdiń ushqyshtar quramyn jattyqtyrýǵa arnalǵan.

Kýrsanttarǵa áýe kemesin meńgerýge tájirıbeli ushqysh-nusqaýshylar kómektesedi.

– Jalpy alǵanda L-39 ushaǵymen ushý, avıatsııany meńgerýdegi alǵashqy qadam bolyp tabylady. Árbir kýrsant úshin jeke ózi ushý – óte mańyzdy sát. Bul ol bolashaqta qarapaıym, kúrdeli pılotaj jasaý, bulttarda, tómen bıiktikte, jerústi jáne áýe nysanalary boıynsha jaýyngerlik qoldanýǵa ushý syndy kezeńderge qol jetkize alady degendi bildiredi, – dep atap ótti oqý-avıatsııa ortalyǵy komandıriniń orynbasary podpolkovnık Maqsat Burataev.

Aero L – 39 Albatros – ushqyshtar quramyn daıarlaýǵa arnalǵan reaktıvti oqý-jaýyngerlik ushaǵy. Keıbir modıfıkatsııalaryn jeńil shabýyldaýshylar men joıǵysh ushaqtar retinde paıdalanýǵa bolady. 2018 jylǵy jaǵdaı boıynsha ol álemniń 30-dan astam elinde paıdalanylǵan, ushý ýchılışeler kýrsanttaryn daıarlaýǵa arnalǵan negizgi mashınalardyń biri bolyp tabylady.

Reaktıvti qozǵaltqysh 6500 m bıiktikte 760 km/saǵ jyldamdyqqa jetýge múmkindik beredi. Ushaqtyń qarý-jaraǵyna bombalaýshy, basqarylmaıtyn zymyran qarýy jáne basqarylatyn zymyrandyq oqý qarýy, kózdeý jáne foto baqylaý jabdyqtary kiredi. Bul tik shúıilý kezinde 50-100 kg kalıbrli erkin túsetin oq-dárilermen maqsatty bombalaýdy, S-5 tıpti basqarylmaıtyn zymyrandarmen maqsatty túrde oq atýdy, ımıtatorlardy qoldana otyryp, áýe nysanalary boıynsha basqarylatyn zymyrandardyń iske qosylý ımıtatsııasyn oryndaýǵa múmkindik beredi.