Qazaqstannyń áýe keńistigine qatysty egemendigi naqtylanady
ASTANA. QazAqparat - Búgin Parlament Májilisinde «Qazaqstan Respýblıkasynyń keıbir zańnamalyq aktilerine áýe keńistigin paıdalaný jáne avıatsııa qyzmeti máseleleri boıynsha ózgerister men tolyqtyrýlar engizý týraly» zań jobasy tanystyryldy.
Atalǵan zań jobasy Halyqaralyq azamattyq avıatsııa uıymy standarttarynyń sońǵy ózgeristerin eskere otyryp, áýe keńistigin paıdalaný, sonymen qatar, ulttyq zańnamadaǵy kollızııalardy joıý maqsatynda ázirlengen. Bul rette áýe keńistigin paıdalaný men avıatsııa qyzmeti aıasynda memlekettik retteýdiń, baqylaý men qadaǵalaý tetigi jasalmaq. Budan bólek, Qazaqstan Respýblıkasynyń áýe keńistigine qatysty egemendigi naqty aıqyndalyp, áýe kemeleriniń halyqaralyq ushýy jáne ishki avıamarshrýttarda ushý kezinde áýe keńistigin paıdalanýdy uıymdastyrýdyń pármendi tetigi qalyptasady. Ekologııalyq jáne ulttyq qaýipsizdik máseleleri problemalaryn sheshýdi eskere otyryp, áýe keńistigin paıdalaný salasyndaǵy ushý qaýipsizdigin qamtamasyz etý jáne jaýapkershilik ınstıtýtyn bekitýdi kózdeıdi. «Tutastaı alǵanda, zań jobasymen ushý qaýipsizdikteriniń deńgeıin arttyryp, avıatsııalyq qyzmettiń jańa túrlerin engizý kózdeledi. Qujat boıynsha 7 zańnamalyq aktige, 3 kodeks pen 4 zańǵa 286 ózgerister engizý qarastyrylyp otyr. Ózgerister tehnıkalyq naqtylaý sıpatynda bolyp tabylady ári jaǵymsyz áleýmettik saldarǵa soqtyrmaıdy», - dedi Investıtsııalar jáne damý vıtse-mınıstri Albert Raý.
Onyń aıtýynsha, ekonomıkalyq, saıası, qoǵamdyq qatynastardyń qazirgi zamanǵy jahandaný protsessteri azamattyq avıatsııa qyzmetin tıisti quqyqtyq retteý jáne ulttyq zańnamany azamattyq avıatsııa salasyn halyqaralyq standarttarmen odan ári odan ári úılestirý qajettiligin týdyryp otyr. Sondyqtan da, zań jobasynda memlekettiń halyqaralyq-quqyqtyq mindettemelerinen týyndaıtyn barlyq mańyzdy elementter, halyqaralyq tájirıbe, IKAO standarttary jáne Ushýlardyń Qaýipsizdigin Tekserýdiń Ámbebap Qadaǵalaý Baǵdarlamasyna qatysty máseleler qamtylatyn bolady.
