Qazaqstannyń áýe keńistigin paıdalanýshylar sany 6% ósti
ASTANA. QazAqparat - 2018 jyldyń 8 aıynda Qazaqstan Respýblıkasynyń áýe keńistigi arqyly ushqan ushaqtardyń sany 171 845-ke jetti. Bul 2017 jyldyń sáıkes kezeńimen salystyrǵanda 9 522-ge artyq. Áýe qozǵalysynyń kólemi 5,87%-ǵa artqan, dep habarlady QR Investıtsııalar jáne damý mınıstrliginiń baspasóz qyzmeti.
Baspasóz málimetterine qaraǵanda, jyl basynan beri qazaqstandyq áýe kompanııalar 66 489 ret, al sheteldik áýe kompanııalar 105 356 ret ushqan.
Áýe qozǵalysy kóleminiń artýy Qazaqstanǵa qonatyn shet memleketterdiń áýe kemeleriniń charterlik reısterin qospaǵanda, ushýdyń barlyq sanattary boıynsha jáne qazaqstandyq áýe kompanııalardyń ishki charterlik reısterinde de baıqalady.
Qazaqstannyń áýe keńistigi arqyly 2018 jyldyń qańtar-tamyz aılarynda turaqty tranzıttik ushýlar sany 76431-ge jetken. Bul ótken jyldyń sáıkes kezeńimen salystyrǵanda 5328-ge (+ 7.49%) artyq. Sheteldik áýe kompanııalarynyń charterlik ushýlary +18,89%-dy qurady (2017 jyly 6 621 reısten 2018 jyly 7 872-ge deıin).
«Tranzıttik qozǵalystyń artýy sheteldik áýe kompanııalardyń turaqty reısteriniń jıiliginiń kóbeıýimen baılanysty. Qazaqstannyń áýejaılaryna qonǵan sheteldik áýe kompanııalardyń turaqty reısteriniń oryndalý sany 2018 jyldyń qańtar-tamyz aılarynda 15 221-ge jetti. Bul ótken jyldyń sáıkes kezeńimen salystyrǵanda 354-ke (+ 2.38%) artyq»,-delingen habarlamada.
