Qazaqstannyń áýe keńistigin qandaı sheteldik áýe kompanııalar paıdalanady
ASTANA. QazAqparat - 2017 jyldyń qańtar-qyrkúıek aılarynyń aralyǵynda Qazaqstanda eldiń áýe keńistigi arqyly tranzıttik ushýlar sany 5,2 paıyzǵa artyp, 87688-ge jetti. Bul týraly QR Investıtsııalar jáne damý mınıstrligi Azamattyq avıatsııa komıtetinen málim etti, dep habarlaıdy QazAqparat.
«2017 jyldyń 9 aıynda Qazaqstannyń áýe keńistiginde qyzmet kórsetilgen ushýlar sany 183877-ni qurady. Onyń ishinde oryndalǵan tranzıttik ushýlar sany 87688-ge jetti. Bul 2016 jyldyń sáıkes kezeńimen salystyrǵanda 5,2 paıyzǵa kóp. Qazaqstannyń áýe keńistigindegi ushýlardyń jalpy sanynyń 50 paıyzdan astamy - tranzıttik», - delingen Komıtet taratqan aqparatta.
Negizgi tranzıttik ushýlardy Eýropadan, Reseıden Ońtústik-Shyǵys jáne Ortalyq Azııa elderine áýe tasymalyn oryndaıtyn alys shetelderdiń jáne TMD elderiniń áýe kompanııalary júzege asyrady. Áýe kompanııalary tranzıttik ushýlardy oryndaý barysynda túrli baǵdarlardy paıdalanady. Máselen, krosspolıarly baǵdar Parsy shyǵanaǵy elderi, Úndistan jáne Pákistannyń AQSh, Kanada baǵytynda oryndalady. Al baǵdarlardyń transazııalyq jelisi Reseı, Qazaqstan, Ózbekstan jáne Túrikmenstan arqyly ótedi. Baǵdarlardyń ońtústik toby Qazaqstannyń ońtústigine qaraı Túrkııa arqyly Kavkaz mańy elderine, Iran men Túrikmenstanǵa jasalady.
«Qazaqstan arqyly ótetin baǵdarlardyń transazııalyq jelisi úlesine Eýropa men Azııa arasyndaǵy tranzıttik qozǵalystardyń shamamen 30-40 paıyzy tıesili. Bul táýligine ortasha eseppen 300-350 áýe kemesin quraıdy», - dep naqtylaıdy Komıtet.
Qazaqstannyń áýe keńistigin paıdalanyp, turaqty tranzıttik ushýlardy júzege asyratyn kompanııalar mynalar: Uzbekistan Airways (aptasyna 200-ge deıin ushýlardy oryndaıdy), Turkish Airlines (130-ǵa deıin), «Aeroflot» (130-ǵa deıin), «Ýralskıe avıalınıı» (110-ǵa deıin), Cathay Pacific (100), China Southern (100), «Sıbır» (100), Air India, KLM, Lufthansa, Thai Airways, Pakistan Airlines, British airways (aptasyna 40-tan 80-ge deıin ushýlar oryndaıdy).
