Qazaqstannyń aýasy eń las qalalary ataldy

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Maǵzum Myrzaǵalıev atmosferalyq aýasy lastanǵan elimizdegi negizgi qalalardy atady, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken baspasóz máslıhatynda sóz sóılegen mınıstrdiń boljamyna sensek, 2019 jyldyń qorytyndysy boıynsha atmosferaǵa lastaýshy zattardyń shyǵaryndylary byltyrǵy - 2,5 mln tonnalyq deńgeıde qalady.

«Atmosferalyq aýaǵa júrgizilgen ekologııalyq taldaý jumystary 45 eldi mekenniń ishinde eń lastanǵan qalalardyń qataryna Nur-Sultan, Almaty, Qaraǵandy, Temirtaý, Atyraý, Aqtóbe, Balqash, Óskemen, Jezqazgan jáne Rıdder kiretinin kórsetip otyr», - dedi Maǵzum Myrzaǵalıev.

Mınıstr sonymen qatar, qorshaǵan ortaǵa jaısyz áser etetin faktorlardy azaıtý úshin ekologııalyq baqylaý júrgiziletinin aıtyp ótti.

«11 aıdyń ishinde biz 1,9 myń tekseris júrgizip, 4,1 myń buzýshylyqty anyqtadyq. Jumysyn toqtatý týraly sotqa 337 materıal joldandy. 194 aryz qanaǵattandyryldy. Memleket kirisine 12,5 mlrd teńge óndirildi», - dedi Maǵzum Myrzaǵalıev.

Mınıstr 2019 jyly tabıǵat qorǵaý sharalaryn júzege asyrý aıasynda tabıǵat paıdalanýshylardyń esebinen 171 mlrd teńge bólingenin, onyń 113 mlrd teńgesi ıgerilgenin jetkizdi.