Qazaqstannyń atom salasynyń qyzmetkerleri búgin kásibı merekelerin atap ótýde
ALMATY. Qyrkúıektiń 28-i. QazAqparat - Qazaqstannyń atom salasynyń qyzmetkerleri búgin ózderiniń kásibı merekelerin atap ótýde. Bul ataýly kún Qazaqstan Respýblıkasynyń 2001 jylǵy 13 jeltoqsandaǵy «Qazaqstan Respýblıkasyndaǵy merekeler týraly» Zańynyń 4 babyna sáıkes bekitildi.
Qyrkúıektiń 28-i kezdeısoq tańdalǵan joq. 1942 jyly naq osy kúni KSRO Memlekettik Qorǵanys komıteti «Ýran boıynsha jumystardy uıymdastyrý týraly» jarlyq shyǵarǵan jáne Ǵylym akademııasy janynda arnaıy atom ıadrosy zerthanasyn qurýdy maquldaǵan bolatyn.
2010 jyldyń birinshi jartyjyldyǵynda Qazaqstanda 8452 tonna ýran óndirildi, bul byltyrǵy jyldyń sáıkes kezeńimen salystyrǵanda, 42 paıyzǵa kóp. Túzetýler engizilgen josparlarǵa sáıkes bıylǵy jyldyń ekinshi jartysynda 9 770 tonna ýran óndirý mejelengen.«Qazatomónerkásip» Ulttyq atom kompanııasynyń esepti kezeńdegi jalpy tabysy 105 mıllıard 687 mln teńgeni qurap, 2009 jyldyń sáıkes kezeńimen salystyrǵanda 58 paıyzǵa artty. Ústimizdegi jyldyń birinshi 6 aılyǵyndaǵy taza tabys 19 mıllıard 414 mıllıon teńgeni qurady, bul 2009 jyldyń osy kezeńindegi kórsetkishten 64 paıyzǵa kóp.
Búgin merekeniń qurmetine atom ónerkásibinde jyldyń basynan beri atqarylǵan jumystardyń qorytyndylary shyǵarylady, eńbekterimen kózge túsken sala qyzmetkerlerine qurmet gramotalary tabys etiledi.
