Qazaqstannyń astyq eksporty artady

NUR-SULTAN. QazAqparat – 2020 jylǵy álemdik astyq ónimi kólemi rekordtyq deńgeıde bolady. Bul týraly QR Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

«Astyq jónindegi halyqaralyq keńestiń esebine sáıkes, (2020 jylǵy 27 tamyz) astyq óndirisiniń Reseıde, Kanadada, Aýstralııada ósýine baılanysty 2020 jylǵy ónim kólemi álemdik rekordtyq deńgeıde – 2,2 trln tonna bolady dep baǵalanýda (2019 jyly –

2,1 trln tonna). Maýsym joǵary astyq qaldyq qorymen – 630 mln tonna mólsherinde aıaqtalady (2019 jyly – 622 mln tonna). Onyń ishinde Astyq jónindegi halyqaralyq keńes Qazaqstanda 17,7 mln tonna kóleminde astyq jınalady dep boljaýda. Bizdiń baǵalaýymyz boıynsha ónim 18 mln tonnany quraıdy», - dedi mınıstr Úkimet otyrysynda.

Saparhan Omarovtyń sózine qaraǵanda, Astyq jónindegi halyqaralyq keńestiń baǵalaýy boıynsha álemde bıdaı óndirý kólemi 763,3 mln tonnany (2019 jyly – 762,2 mln tonna), onyń ishinde Qazaqstanda 12,4 mln tonnany (2019 jyly – 11,5 mln tonna) quraıdy.

«Jańa maýsymda qazaqstandyq bıdaı men unnyń negizgi jetkizilimderi dástúrli túrde Orta Azııa elderi men Aýǵanstan naryǵyna joldanatyn bolady. Astyq sapasynyń joǵary bolýynan Qytaıǵa bıdaı (HI-Pro) jóneltilimi artýy múmkin», - dedi Saparhan Omarov.