Qazaqstannyń astyq eksporty áleýeti joǵary deńgeıde qalady - Asqar Mamın
«Egin jınaýǵa daıyndyq máselesinde de jumystardy qarjylaı jáne materıaldyq-tehnıkalyq qamtamasyz etý boıynsha barlyq sharalar qabyldandy. Qazirgi tańda, AQSh aýyl sharýashylyǵy mınıstrliginiń boljamdary boıynsha AQSh-ta bıdaı túsimi 4,4 paıyzǵa, Kanadada 32 jáne Reseıde 15 paıyzǵa tómendeýi múmkin. Jalpy, Qazaqstan boljam boıynsha ózin astyqpen tolyq qamtamasyz etedi», - dedi A. Mamın.
Úkimet basshysynyń aıtýynsha, eksporttyq áleýet joǵary deńgeıde qalady – shamamen 6,5-7 mln tonna.
«Sondyqtan basty mindetimiz – egin jınaýdy ýaqtyly ári sapaly ótkizý. Jalpy mynadaı máselelerge kóńil bólgim keledi. Birinshiden, Aýyl sharýashylyǵy mınıstrligi men oblystardyń ákimdikteri qys mezgiline jem-shóp qoryn sapaly daıyndaý jáne onyń baǵalaryn turaqty bolýyn qamtamasyz etý jóninde barlyq qajetti sharalardy qabyldasyn. Ekinshiden, egindi sapaly jınap qana qoımaı, bıdaı saqtaýdyń tıisti sharttaryn da baqylaýda ustaý kerek. Elevatorlardyń egin qabyldaý men jınaýǵa ázirligin qamtamasyz etý qajet», - dedi Asqar Mamın.
Sonymen qatar Energetıka mınıstrligine egin jınaý kezinde janar-jaǵarmaımen ýaqtyly qamtamasyz etý máselesin turaqty baqylaýda ustaý tapsyryldy.
