Qazaqstannyń astyǵy qaıda eksporttalady
ASTANA. QazAqparat - "Azyq-túlik korporatsııasy" AQ Eksporttyq kelisimsharttar departamentiniń dırektory Nurjan Muxamedjanovtyń aıtýynsha, Reseıde úsh jyldan beri astyqtyń rekordtyq kólemi jınalǵan. Sondyqtan ol jaqtan astyq tasymaldaý tıimsiz. Óıtkeni reseılikter aldymen óz astyǵyn eksporttaýǵa tyrysady, dep xabarlaıdy QazAqparat tilshisi.
"Sol sebepti biz quziretti memlekettik organmen birlese otyryp, Qytaıǵa tasymaldanatyn astyǵymyzdyń kólemin ulǵaıtýdy pysyqtap jatyrmyz. Qytaı arqyly tranzıt jasaý jaǵyn da qarystyrýdamyz. Budan bólek, aýyl sharýashylyǵy mınıstrligimen birlesip, Iran arqyly qazaqstandyq astyqty tasymaldaýǵa kelistik. Iran ashyq tranzıt beredi. Sol arqyly Parsy shyǵanaǵy elderine shyǵatyn bolamyz. Ol jaqta astyqty da, maıly daqyldardy da jaqsy tutynady", - dedi N.Muxamedjanov Astanada ótken baspasóz máslıxatynda.
Departament basshysy qazirgi vagon tapshylyǵyn da túsindirdi. Onyń sózine qaraǵanda, búginde Qazaqstannyń astyǵy Ortalyq Azııa men Aýǵanstanǵa jıi tasymaldanady. Suranys azaıǵanda bári osy baǵytqa lap beredi. Sol kezde vagon keptelisteri bolady. "Bul jerde bir máseleni eskerý kerek, ol jaqta astyqty túsirý jyldamdyǵy bizdegi ony tıeý jyldamdyǵymen birdeı emes. Sondyqtan vagondar uzaq turady, bos vagondar ýaqytynda qaıtpaıdy. Tapshylyq ta sodan paıda bolady", - dep atap kórsetti N.Muxamedjanov.
Aıta keteıik, Úkimettiń keshegi otyrysynda QR Premer-Mınıstri Baqytjan Saǵyntaev dıqandardyń astyǵyn joǵary baǵamen satyp alýǵa tapsyrma berdi. Sebebi qyrkúıek aıynan bastap ishki naryqta astyqtyń baǵasy tómendep ketti. Oǵan birneshe faktor áser etti. Birinshiden, bıyl Reseıde astyqtyń rekordtyq kólemi jınaldy. Sodan Qazaqstanmen shekaralas aımaqtarda arzan astyq kóbeıip, zańsyz jolmen tasymaldana bastady. Ekinshiden, vagondardyń tapshylyǵy ózekti bolyp tur. Vagon jetispegennen keıin xalyqaralyq treıderlerdiń talaptary oryndalmaıdy. Úshinshiden, Azyq-túlik korporatsııasy sylbyr qımyldap jatyr. Atalǵan kompanııa basynda bir tonna astyqtyń baǵasyn 42 myń dep qoısa, artynan 39 myńǵa túsirdi. Osynyń barlyǵy suranystyń tómendep, astyqtyń kúrt arzandaýyna ákelip soqtyrdy.
"Sońǵy bir apta boıy biz osy máseleni kúnde pysyqtap kelemiz. Barlyǵy qoldap otyr. Qarjynyń kózin anyqtadyq. Baǵany 42 myń dep belgiledik. Endi, astyqty satyp alý sharalaryn abyroımen atqaryp shyǵý qajet. Ony jyldam ári ashyq túrde ótkizý kerek. Osyǵan balanysty oblys ákimderi arnaıy shtabtardy qursyn. Oǵan ákimdik qyzmetkerlerin ǵana emes "Atameken" palatasy men Qazaqstannyń fermerleri odaǵyn da tartý qajet. Aqsha adresatqa jetýi tıis. Reseıdiń astyǵyna, ıa bolmasa, bir qolǵa ketip qalmasyn. Sondyqtan osy máseleni qatań baqylaýda ustańyzdar!", - dep atap kórsetti Úkimet basshysy .
