Qazaqstannyń Astana protsesin ótkizýdegi kúsh-jigerin joǵary baǵalaımyz - Iordanııa Koroli

ASTANA. QazAqparat - Iordanııa Qazaqstannyń Astana protsesin ótkizýdegi kúsh-jigerin joǵary baǵalaıdy. Bul týraly búgin Aqordada elimizge resmı saparmen kelgen Iordanııa Hashımıt Koroldiginiń Koroli Abdalla ІІ ben ál-Hýseın Elbasy Nursultan Nazarbaevpen kelissózderden keıingi birlesken baspasóz málimdemesinde aıtty, dep habarlaıdy QazAqparat.

«Terrorızm men ekstremızm máselesi óte mańyzdy. Biz terrorıstik toptar jahandyq qaýipsizdikke jańa qaterler tóndirmegendigin qalaımyz. Sondyqtan Sırııadaǵy turaqtylyqty qamtamasyz etý barynsha mańyzdy sanalady. Siz sırııalyq qaqtyǵysty deeskalatsııalaý boıynsha barlyq kúsh-jigerdi qoldaısyz jáne Jeneva kelissózderin tabysty ótkizý úshin jaqsy platforma usynyp otyrsyz. Biz Qazaqstannyń Astana protsesin ótkizýdegi kúsh-jigerin joǵary baǵalaımyz», - dedi Iordanııa Koroli Elbasy Nursultan Nazarbaevqa qarata.

Óz kezeginde Qazaqstan Prezıdenti Iordanııanyń Taıaý Shyǵysta beıbitshilik pen qaýipsizdik ornatýda mańyzdy ról atqaryp kele jatqanyn basa aıtty. 

«Iordanııa halyqaralyq qoǵamdastyqta joǵary bedelge ıe bolyp, laıyqty qurmetke bólendi. Sol arqyly Taıaý Shyǵysta beıbitshilik pen qaýipsizdik ornatýda mańyzdy ról atqaryp kele jatqanyn bilemiz. Búgingi Sırııada bolyp jatqan jaǵdaı, lańkestik áreketter, bosqyndar - barlyǵy da sol eldegi kelispeýshilikten, qaqtyǵystan týyndaýda. Osynyń áserinen búginde Iordanııa 1,3 mıllıonnan astam sırııalyq bosqyndy qabyldap, Palestına men Izraıl arasyndaǵy beıbit protseske aıryqsha úles qosqanyn atap ótýge bolady», - dedi Nursultan Nazarbaev.