Qazaqstannyń áskerleri jańa úlgidegi arnaıy tehnıkalarmen tolyqty
Radıatsııalyq, hımııalyq jáne bıologııalyq qorǵaý áskerleriniń jaraq quramyna bıologııalyq barlaý mashınalarynyń zamanaýı keshenderi kelip tústi.
«Qaýipsiz el» ulttyq jobasyn iske asyrý aıasynda Qorǵanys mınıstrligi Qazaqstan áskerin tehnıkalyq men jaýyngerlik jaraqtandyrý máselelerin pysyqtaýda. Otandyq úlgidegi qarý-jaraq ázirleý basym baǵyt bolyp tabylady.
Otandyq «OTS NETWORK» kompanııasy bıologııalyq barlaý keshenderin ázirlep shyǵardy. Olar áskerlerdiń qajettilikterine qaraı zııatkerlik aqparattyq tehnologııalardy qoldana otyryp jobalandy. Bıologııalyq sıpattaǵy tótenshe jaǵdaı aýmaǵyndaǵy arnaıy tehnıka patogenderdi anyqtaý jáne olardy shuǵyl taldaý úshin zerthana jaraǵymen, jedel túsirilim júrgizýge qajetti sholý beınekamerasymen jabdyqtalǵan. GPS/Glonass termınalynyń bıologııalyq zaqymdaý aımaqtarynyń derekterin tirkeý jáne jerseriktik baılanys júıesi arqyly málimetterdi jedel berý múmkindigi bar.
Qazirgi ýaqytta mobıldik keshenderdi jınaqtaý men jumysqa qabilettiligin tekserý synaqtary aıaqtaldy. Jeke quram olardy paıdalanýdy oqyp-úırendi. Jýyrda arnaıy jabdyq maqsatqa sáıkes qoldaný úshin áskerlerge jiberiledi.
