Qazaqstannyń áskerıleri halyqaralyq saıystyń zenıttik zymyran júıesi atalymynda úshinshi orynǵa ıe boldy (FOTO)
«S-300PS zenıttik zymyran júıesi» nomınatsııasynda Qazaqstan Qarýly kúshteriniń áskerı qyzmetshileri úshinshi oryndy enshiledi. Birinshi oryndy Reseı Federatsııasynyń komandasy ıelense, ekinshi oryndy Belarýs Respýblıkasynyń komandasy jeńip aldy.
«Jarysta bizge jaýyngerlik jaǵdaıdaǵy eseptoptar men ekıpajdardyń shynaıy is-qımyldaryn kórsetti. Urys mashınalaryn júrgizý, eseptoptyń tehnıkany jaýyngerlik ázirliktiń ártúrli, ıaǵnı, joryqtyq jáne jaýyngerlik dárejelerine kóshirý sheberligi boıynsha baıqaý kezeńderi bizge jaqsy tájirıbe berdi. Men barlyq konkýrsanttarǵa qyzmette úlken sáttilik, myqty densaýlyq, orta jolda toqtap qalmaı, alǵa qaraı ilgerilep, áskerı sheberlik pen jaýyngerlik daǵdy turǵysynda shyńdalýlaryna tilektespin», - dedi QR QK Áýe qorǵanysy kúshteriniń bas qolbasshysy avıatsııa general-leıtenanty Nurlan Ormanbetov.
Baıqaý sońynda qatysýshy komandalardyń jaýyngerlik eseptoptary «Armavır» jáne «Qaban» zymyran nysanalary boıynsha zenıttik basqarylatyn zymyrandardy, elestetiletin aerodınamıkalyq jáne ballıstıkalyq mejelerdi iske qosýmen áýe nysanalary boıynsha áýe shabýylyna qarsy urys júrgizdi.
Meımandar S-300 ZZJ jaýyngerlik zymyrandarynyń iske qosylýyn, áýe jáne jerústi nysanalar boıynsha «Pantsır-S» ZRPK-nyń oq atýlaryn, sondaı-aq, basqarylatyn zymyrandardy iske qosýmen MıG-29 joıǵyshtary arasyndaǵy áýe «shaıqasyn» jáne Tý-22M3 jáne Sý-34 ushaqtarynyń jerústi nysanalar boıynsha bomba laqtyrýyn tamashalady.
«Aspan kilti» halyqaralyq saıysy alty baıqaý kezeńi boıynsha ótkenin esterińizge sala keteıik. Atap aıtqanda, shynaıy avıatsııany belgileýmen qarsylastyń áýe soqqysyna toıtarys berý, iske qosý qondyrǵysyn oqtaýmen zymyrandardyń iske qosylýyn elestetý, mehanık-júrgizýshilerdiń jarysy, zenıttik zymyran dıvızıonynyń manevr jasaýy jáne jaýyngerlik iske qosýlarmen áýe qarsylasynyń soqqysyn toıtarý. Saıys jeńimpazdaryna Reseı Federatsııasy áýe-ǵarysh kúshteri qolbasshylyǵynyń ókilderi jáne shetel memleketteriniń áskerı sarapshylary ókilderiniń qolynan baǵaly syılyqtar - ÝAZ «Patrıot» avtomobıli, kvadrotsıkldar, skýterler, kompıýterlik noýtbýkter tabys etildi. Ár komandaǵa estelik kýboktar tapsyrylyp, medaldar jáne ataýly gramotalarmen marapattaldy.
