Qazaqstannyń áskerıleri halyqaralyq armııa oıyndarynyń úsh saıysynda jeńimpaz atandy

NUR-SULTAN. QazAqparat – Áskerı qyzmetshiler arasyndaǵy halyqaralyq oıyndardyń «Artıllerııadan oq atý sheberleri», «Taktıkalyq mergen» jáne «Merıdıan» jarystary aıaqtalyp, olardyń qorytyndysy boıynsha qazaqstandyq jaýyngerler kósh bastap tur, dep habarlaıdy QazAqparat QR Qorǵanys mınıstrligine silteme jasap.

Jambyl oblysyndaǵy «Gvardeısk» polıgonynda ótip jatqan mınaatqysh eseptoptardyń jarysynda qazaqstandyq artıllerıster úshinshi estafeta kezeńinde de úzdik dep tanyldy. Qazaqstan komandasy «Artıllerııadan oq atý sheberleri» baıqaýynda ekinshi jáne úshinshi oryndardy ıelengen Reseı men Ázerbaıjannyń áskerı qyzmetshilerin basyp ozdy.

Aqmola oblysyndaǵy «Amandyq» polıgonynda áskerı topograftardyń «Merıdıan» baıqaýynda qazaqstandyq komanda jeńiske jetti. «Topografııalyq kvadratlon» dep atalatyn qorytyndy kezeńde qatysýshylar «labırıntten» ótip, kedergiler jolaǵyn eńserdi, bólek-bólek topografııalyq kartalardan obektilerdiń koordınattaryn anyqtady.

Topogeodezııalyq eseptop quramynda aǵa leıtenant Ernat Sultanǵazy, aǵa leıtenant Nurbek Rysqojaev jáne kapıtan Nurbolat Jumabekov baǵyt boıynsha ótýden úzdik nátıje kórsetip, onyń nátıjesi Qazaqstanǵa baıqaýdyń jalpy jeńisin qamtamasyz etti. Ekinshi oryn Qytaı áskerı qyzmetshilerine, úshinshi oryn Belarýs eline buıyrdy.

«Merıdıan» baıqaýynda mamandardyń kúrdeli geodezııalyq eseptoptardyń eptiligin, topogeodezııalyq bólimshelerdiń sheberligi men úılesimdigi tekseriledi. Bundaı sátte ıntýıtsııa jáne logıkalyq oılaý qasıetteri de mańyzdy. Bıyl komandalardyń daıyndyq deńgeıi joǵary», - dep atap ótti baıqaýdyń bas tóreshisi polkovnık Shaıahmet Áshirov.

Qaraǵandy oblysyndaǵy «Spassk» oqý-jattyǵý ortalyǵynda «Taktıkalyq mergen» baıqaýyna qatysýshylar qorytyndy kezeńde top quramynda is-qımyl jasaı otyryp, oq atý tapsyrmalaryn oryndady. Qatysýshylar oıly-qyrly jerlermen júrip ótip, ǵımarattaǵy jáne shatqaldaǵy nysanalarǵa oq jaýdyrdy.

«Qatysýshylarǵa qosymsha qıyndyq týdyrǵan ekstremaldy dene belsendiligi men jyldam qozǵalys boldy. Saıysýshylar dál atý úshin kúsh-jigeri men baıyptylyǵyn saqtap, komandanyń taktıkalyq turǵydan tekserilgen is-áreketteri týraly umytpaýlary qajet boldy. Sebebi, komandanyń bir múshesiniń qateligi búkil toptyń nátıjesine áser etedi», - dedi baıqaýdyń tóreshisi Ǵalym Sadyqov.

Sońǵy kezeńde de jáne «Taktıkalyq mergen» baıqaýynyń qorytyndysy boıynsha da Qazaqstan jaýyngerleri jeńiske jetti. Baıqaýda ekinshi oryndy Qytaı komandasy ıelense, úshinshi oryndy Reseı men Ózbekstannyń áskerı qyzmetshileri ózara bólisti.

Foto : gov.kz