Qazaqstannyń áskerı joǵary oqý oryndaryna jańa erejeler boıynsha qabyldaıtyn bolady
ASTANA. QazAqparat - Qazaqstannyń joǵary áskerı oqý oryndaryna qabyldaýdyń erejeleri ózgertildi. Bul týraly QR Qorǵanys mınıstrliginiń baspasóz qyzmetinen habarlady.
Jańa qaǵıdalarǵa sáıkes testileýde talapkerler tańdaı alatyn pánderdiń tizimi keńeıdi. Áskerı oqý oryndaryna túsý úshin (tańdalatyn áskerı mamandyqqa qaramastan) fızıka, geografııa, hımııa, bıologııa jáne dúnıejúzi tarıhy pánderi belgilendi.
Sonymen birge, oqýǵa túsý úshin qujattardy resimdeý rásimi qysqartyldy, sondaı-aq olardy qabyldaý merzimi uzartyldy. Atap aıtqanda, QR QM joǵary áskerı oqý oryndary men Kadet korpýsyna 20 shildege deıin, respýblıkalyq áskerı mektepterge 15 tamyzǵa deıin qujattar qabyldanady. Áskerı oqý oryndaryna alý 21 tamyzǵa deıin júrgiziledi. Odan basqa, endi talapkerlerdiń TKT sertıfıkattaryn usynbaı-aq jergilikti áskerı basqarý organdarynda (áskerı komıssarıattarda) medıtsınalyq kýálandyrýdan ótýlerine múmkindikteri bar.
Qazirgi ýaqytta Qazaqstanda bakalavrıat baǵdarlamasy boıynsha áskerı mamandardy daıarlaýdy júzege asyratyn úsh áskerı joǵary oqý orny iske qosylǵan. Ol Qurlyq áskerleriniń áskerı ınstıtýty, Radıoelektronıka jáne baılanys áskerı-ınjenerlik ınstıtýty, Keńes Odaǵynyń eki márte batyry T. Bıgeldınov atyndaǵy Áýe qorǵanysy kúshteriniń áskerı ınstıtýty.
Ótken eki jyl ishinde munda elimizdiń túkpir-túkpirinen jınalǵan orta jáne orta arnaýly oqý oryndarynyń 1 144 bitirýshisi oqýǵa tústi. Qazirgi kezde Qazaqstannyń úsh áskerı bilim oshaǵy jańa kýrsanttardy qabyldaýǵa daıyn.
