Qazaqstannyń áskerı jáne qos maqsattaǵy buıymdary Reseıdegi forýmda usynyldy

ASTANA. QazAqparat - UQShU-nyń delegatsııasy Bas hatshy Nıkolaı Bordıýjanyń basshylyq etýimen bul kúnderi Reseı Federatsııasynda ótip jatqan «Armııa-2016» halyqaralyq áskerı-tehnıkalyq forýmy barysynda qazaqstandyq stendti kórýge bardy.

QR Qorǵanys mınıstrliginiń baspasóz qyzmetiniń habarlaýynsha,  «Qazaqstan ınjınırıng» UK» AQ basqarmasynyń tóraǵasy Erlan Ydyrysov ulttyq kompanııanyń qyzmeti týraly áńgimelep, meımandardy tehnıka men qarý-jaraqtyń jańa úlgilerimen tanystyrdy. «Qazaqstan ınjınırıng» UK» AQ-tyń ekspozıtsııasymen reseı kásiporyndarynyń ókilderimen kelissózderge qatysý úshin Kýbınka qalasyna kelgen QR Qorǵanys mınıstriniń orynbasary Oqas Saparov ta tanysty.

Qazaqstan forýmda alty kásiporyn ónimin usyndy. Olar: «Qazaqstan Paramaýnt Injınırıng» JShS, «KAE» JShS,  «S.M. Kırov atyndaǵy zaýyt» AQ, «S.M. Kırov atyndaǵy mashına qurastyrý zaýyty» AQ, AO «№405-avıajóndeý zaýyty», sondaı-aq, «Zhasampaz» konsortsıýmy. Kompanııanyń stendtinde áskerı jáne qos maqsattaǵy buıymdardyń 46 tabıǵı úlgisi men 13 sulbasy qoıylǵan. Olardyń arasynda túngi kórý kózdeýishteri, jylý vızııalyq júıeler, barlaý jáne qadaǵalaý aspaptary, korablder men sýasty qaıyqtardy óndirýshilerge arnalǵan keme gıdravlıkasynyń tolymdaýshy buıymdary, Mı-17V-5, Mı-8 tikushaqtarynyń sulbalary, sondaı-aq, qazaqstandyq óndiristiń brondy keýdesheleri, dýlyǵalary men áskerı kıim-keshegi bar.