Qazaqstannyń áskerı ushqyshtaryna birinshi jáne ekinshi synypty biliktilik berildi (FOTO)
«Qazaqstan Respýblıkasynyń Qarýly Kúshteri, Áýe qorǵanysy kúshteriniń áskerı qyzmetshileri jaýyngerlik oqý men qyzmette ózderiniń jetistikterimen elimizdiń qorǵanys qabilettiligin nyǵaıtý isine qomaqty úles qosyp, memleketimizdiń egemendigi men aýmaqtyq bútindigin myzǵymastaı etip qorǵaýda», - dedi QR QK ÁQK bas qolbasshysy avıatsııa general-leıtenanty Nurlan Ormanbetov.
Áskerı ushqyshtardyń synyptyq biliktiligi - bilimderi men praktıkalyq mashyqtarynyń deńgeıine sáıkes ushý quramy daıarlyǵynyń kásibı deńgeıin, berilgen ýaqytta fýnktsıonaldyq mindetteriniń belgili bir kólemin sheber jáne joǵary sapada oryndaýmen sıpattalatyn aıryqsha kórsetkish ekenin aıta keteıik.
«Birinshi synypty áskerı ushqysh» biliktiligi 50185 áskerı bóliminiń komandıri polkovnık Ermek Saparov pen shtab bastyǵy podpolkovnık Renat Dármenovke berildi. «Ekinshi synypty áskerı ushqysh» biliktiligin maıor Nurbol Saparbaev pen Ivan Gavrılkoǵa berdi. Ushqyshqa synyptyq biliktiligin arttyrý úshin kúndiz jáne túnde kúrdeli meteorologııalyq jaǵdaılarda belgili bir saǵat sanyn ushyp ótýi, jaýyngerlik qoldanýǵa mindetti sandy oryndaýy qajet. «1-synypty ushqysh» deńgeıine qol jetkizý úshin jyldar boıy udaıy ushý qajet. Oqý-jattyqtyrý ushýlarynan basqa, bazalyq áýeaılaqtarda, ÁÁK-niń bólimderinde jıyn daıarlyǵy ótkiziledi. Onda ártúrli bólimderden jınalǵan ushqyshtar avıabazalardyń birine kelip, tájirıbeli nusqaýshy ushqyshtardyń jetekshilik etýimen ushýdyń anaǵurlym kúrdeli túrlerine daıyndalady. Sonymen, jyl saıyn kúrdeli meteorologııalyq jaǵdaılarda ushýlarǵa eki nemese úsh aptalyq jıyndar ótkiziledi. Atalmysh jıyndar ádette, kúzgi-qysqy jáne kóktemgi-qysqy kezeńderde ótedi. Bir jyl boıy arnaıy tapsyrmalardy oryndaýǵa daıyndyq boıynsha jıyndar ótkiziledi.
Máselen, armııalyq avıatsııanyń ushqyshtary joǵary bıik taýly alańdarǵa ushýǵa, qurlyqtyń jáne sýdyń ústińgi betinde izdeý-qutqarý jumystaryna, sý aǵyzý qurylǵysymen jumys jasaý jumystaryna, órtti sóndirýge qamdanady. Jerústi nysanalar boıynsha avıatsııalyq polıgondarda oq atýlardy ótkizedi. Mańdaısheptik avıatsııanyń ushqyshtarymen kúndiz-túni áýe mejeleri boıynsha basqarylatyn zymyrandardy iske qosý boıynsha jıyndar ótkiziledi. Atalǵan jıyndarda daıyndyqtan bólek, ártúrli ushý tapsyrmalaryn oryndaýdyń, tájirıbe almasýdyń biryńǵaı ádistemesiniń ázirlenýi júzege asyrylady.
