Qazaqstannyń áskerı ushqyshtary Reseıdiń áýe bazasynda jattyǵýda (FOTO)

ASTANA. QazAqparat - Sý-27 jáne MıG-29 ushaqtary men tikushaqtarynyń, Sý-25 shabýyldaǵyshtarynyń, sondaı-aq, Mı-8 ben Mı-17 kóliktik-jaýyngerlik tikushaqtarynyń ekıpajdary Reseıdegi Dýbrovıchı polıgonyna ushyp baryp, jattyǵýlarǵa kiristi, dep habarlaıdy QR Qorǵanys mınıstrliginiń baspasóz qyzmeti.

«Bul iri saıys - «Avıadarts-2016» halyqaralyq baıqaýy aldyndaǵy áskerı ushqyshtarymyzdyń sońǵy daıyndyq jumystary. Ushý quramy qarqyndy jattyǵýda, áýeaılaqtarda ınjenerlik-tehnıkalyq quram men ushýlardy jerústi qamtamasyz etý mamandary udaıy ázirlikte», delingen habarlamada.

Bul baıqaýda Qazaqstannyń namysyn qorǵaıtyn ushqyshtar - kapıtan Grıgorıı Kondratıýk, Ádil Ysqaqov, Azat Abdýllın jáne Vladımır Jeleznov - «Avıadartsqa» ekinshi márte qatysqaly otyr. Olar qarsylastardyń saıysýy men múmkindikteri týraly habardar. Alaıda, budan jaýapkershilik pen tolqynys azaıar emes.

«Mundaı halyqaralyq deńgeıde elimizdiń namysyn qorǵaý - biz úshin úlken abyroı. Konkýrsta laıyqty qarsylastar bolatyny sózsiz. Ushqyshtarymyzda áleýet, tájirıbe jáne eń bastysy - jeńiske jetýge degen qulshynys bar», - dedi kapıtan Grıgorıı Kondratıýk.

Qatysýshylardyń aıtýynsha, ushý jáne ınjenerlik-tehnıkalyq quramdar úshin bul baıqaý jaqsy praktıka bolyp tabylady. Birinshiden, ol jaýyngerlik jaǵdaılarǵa jaqyndatylǵan. Ekinshiden, qarsylastaryna óz deńgeıińdi kórsetip, úzdikterdiń tájirıbesin jınaqtaýǵa bolady. Al úshinshiden, Áskerı-áýe kúshterimiz ben jalpy, Qarýly kúshterdiń bedelin kóterýge múmkindik bar. Baıqaýda ushý ekıpajdarymyzǵa Reseı, Ázirbaıjan, Qytaı, Pákistan jáne Belarýstiń ushqyshtarymen baq synasýǵa týra keledi.

«Avıadartstyń» baǵdarlamasy óte aýqymdy. ıAǵnı, pılotajdaý, navıgatsııa tehnıkasyna ushaqtar men tikushaqtardyń ekıpajdaryna arnalǵan ushý tapsyrmalary, kózben sholyp áýeden barlaý baǵdarlary, sondaı-aq, jerústi nysanalar boıynsha jaýyngerlik qoldaný. 

Barlyq ushýlar qarapaıym meteorologııalyq jaǵdaılarda oryndalady. Baıqaý sońynda ushqyshtar shydamdylyq pen shapshańdylyq boıynsha dene daıarlyǵy turǵysynda saıysqa túsedi. Baıqaý 1-12 tamyz aralyǵynda Armııa halyqaralyq oıyndary-2016 sheńberinde ótetinin aıta keteıik.