Qazaqstannyń áskerı topograftary zamanaýı tehnologııamen qamtamasyz etilgen - Bas shtab

ASTANA. QazAqparat – Bas shtabtyń geoaqparattyq qamtamasyz etý departamenti bastyǵynyń orynbasary polkovnık Shaıahmet Áshirov áskerı topograftar qyzmetiniń erekshelikteri týraly aıtyp berdi, dep habarlaıdy QazAqparat tilshisi.

«Álemdegi qaqtyǵystardy, áskerı shıelenisterdi eskere otyryp, bizdiń departament 2019 jyly qurylǵan edi. Osy oraıda, bizdiń qurylymnyń negizgi jumysyna toqtalsaq, birinshi baǵyty topogeodezııa aqparatymen qamtamasyz etýge arnalǵan. Onyń arasynda kartografııalyq zertteýlerdi usyný qamtylǵan. Ekinshiden, gıdrometeorologııa salasyndaǵy aqparatty basshylyq quramǵa, áýe qorǵanysy kúshterine joldaımyz. Al, úshinshi baǵyt aıasynda navıgatsııa málimetterin Qarýly kúshter qurylymdaryna taratamyz», - dedi Sh. Áshirov Qorǵanys mınıstrliginiń online-brıfıngide.

Osy oraıda, ol elimizdegi áskerı topograftar biliktiligin tıisti oqý-jattyǵýlar kezinde shyńdaıtynyn, sondaı-aq sońǵy býyndy quraldarmen, jabdyqtarmen qamtamasyz etilgenin aıtty.

«Olar jahandyq spýtnıktik júıelerdi de paıdalanady. Áskerı oqý-jattyǵýlar kezinde osy zamanaýı tehnıologııalardy barynsha qoldanyp jatyr. Atap aıtqanda, áskerı topograftar jaqsy nátıje kórsetip júr jáne olardyń jumysyn komandırler joǵary baǵalap keledi. Bizdiń mamandardy sońǵy býyndy tehnologııalarmen qamtamasyz etý de jaqsy deńgeıde ekenin atap ótken jón», - dedi Geoaqparattyq qamtamasyz etý departamentiniń ókili.

Aıta keteıik, 30 qańtar kúni áskerı topograftar tól merekesin atap ótedi.