Qazaqstannyń áskerı teńizshileri Bahreın Koroldiginde teńiz ınfraqurylymynyń máselelerin talqylady

ASTANA. QazAqparat - Qazaqstan Respýblıkasy men AQSh qorǵanys vedomstvolary arasynda ekijaqty yntymaqtastyq sheńberinde QR QK ÁTK-niń bas qolbasshysy kontr-admıral Jandarbek Janzaqov teńiz ınfraqurylymynyń qaýipsizdigi jónindegi halyqaralyq sımpozıýmǵa qatysty. Bul týraly Qorǵanys mınıstrliginiń baspasóz qyzmeti habarlady.

Búgingi tańda teńiz ınfraqurylymy máselesi óte ózekti. Jahannyń kóptegen elderi lańkesterdiń, qaraqshylardyń tarapynan qaýip-qaterlerge dýshar bolyp otyr. Osy qaterdi boldyrmaý jáne saýda kemeleriniń teńizde júzý qaýipsizdigin qamtamasyz etýde teńiz kompanııalary Áskerı-teńiz kúshteri men jaǵalaý kúzetimen tyǵyz qarym-qatynasta bolýy qajet.

Konferentsııa barysynda 30 eldiń Áskerı-teńiz kúshteriniń ókilderi, 20-dan asa kompanııa jáne áskerı-teńiz salasyndaǵy 30-dan asa maman osy jáne ózge de máselelerdi talqylady.

Odan basqa, sapar barysynda QR QK ÁTK bas qolbasshysy besinshi flottyń qolbasshysy vıtse-admıral K. Doneganmen kezdesti. Kezdesýde QR QK ÁTK áskerı qyzmetshileriniń AQSh ÁTK 5-shi flotynyń korablderinde praktıkadan jáne taǵylymdaman sátti ótýi, sondaı-aq olardyń ártúrli konferentsııalarǵa, forýmdar men sımpozıýmdarǵa qatysýy talqylandy. Sonymen qatar, eki eldiń áskerı qyzmetshileri AQSh ÁTK-niń «Proud Lions» korabline bardy. Búgingi tańda shetelde QR Áskerı-teńiz kúshteriniń bolashaq áskerı qyzmetshileri atanatyn 50-den asa qazaqstandyq kýrsant bilim alyp júrgenin aıta keteıik.