Qazaqstannyń Áskerı-teńiz kúshteri sarbazdarmen tolyqty

AQTAÝ. QazAqparat – Aqtaý garnızonynyń Áskerı-teńiz bazasyna poıyzben 3 myń shaqyrymnan asa jol júrip ótip, Shyǵys Qazaqstan jáne Pavlodar oblystarynan áskerge shaqyrylǵandardyń alǵashqy legi jetti. Bul týraly QazAqparat Qorǵanys mınıstrliginiń baspasóz qyzmetine silteme jasap habarlaıdy.

Jas sarbazdardy áskerı orkestrdiń súıemeldeýimen kútip aldy. Matrostarǵa bólimsheniń komandalyq quramy tanystyrylyp, olar qyzmet etetin áskerı bólimniń tarıhy jaıly aıtyldy.

Bastapqyda áskerge kelgender negizgi oqý pánderinen bir aılyq jalpy áskerı daıyndyq kýrsynan ótedi. Sabaqtardy asa tájirıbeli jáne barynsha daıyndalǵan ofıtserler men starshınalar júrgizedi.

«Boryshymdy óteý úshin men Pavlodar oblysynan keldim. Otandy qorǵaý – Qazaqstannyń árbir azamatynyń boryshy dep sanaımyn. Men áskerı teńizshi degen ataqty abyroımen alyp júrýge tyrysamyn. Bir jyl kózdi ashyp-jumǵansha tez ótedi, bastysy paıdaly nárse úırenýge ketedi dep oılaımyn», - dedi áskerge jańa kelgen Aıan Masyqbaev.

Jas jaýynger kýrsynan jáne áskerı ant berý rásiminen keıin teńizshiler Áskerı-teńiz kúshteriniń ártúrli korablder dıvızıonyndaǵy jaýyngerlik kemelerde qyzmet etetin bolady.