Qazaqstannyń áskerı sotynyń tóraǵasy Serik Baıbatyrovqa qastandyq jasaǵan 39 jasar Rýslan Edresov izdestirilýde

Bul týraly búgin Almaty qalalyq ІІD-niń baspasóz qyzmeti resmı málimdeme taratty.

Esterińizge sala keteıik, oqıǵa keshe tańǵy saǵat 9-dar shamasynda Almaty qalasynyń Bostandyq aýdanynda oryn alǵan. Áskerı sottyń tóraǵasy mingen qyzmettik kólikke Jarokov kóshesimen Levıtan kóshesiniń qıylysynda «Mitsubishi Pajero» kóligi qýyp jetip, tutqıyldan oq atqan.

«Oqıǵa oryn alǵan soń arada 2 mınýt ótkende kúdikti avtokóliktiń sońyna Jol polıtsııasynyń kezekshi qyzmeti túsip, qýǵyn 7 kóshe oramynan ótkenshe jalǵasty. Jol tańdamaıtyn bıik avtokólik atalǵan mańaıdaǵy jol jóndeý aýmaǵyn paıdalanyp, jol jıegimen ótip úı aýlalary arqyly izin jasyrǵan. Sonymen birge qalada «Tutqyndaý» sharasy engizildi», - deıdi qalalyq ІІD baspasóz qyzmetiniń bastyǵy Saltanat Ázirbek. Onyń aıtýynsha, jedel-tergeý toptary Serik Baıbatyrovtyń burynǵy kúıeý balasy 39 jasar Rýslan Edresovtyń atalǵan qylmysqa qatysty birneshe zattaı aıǵaqtaryn qylmystyq iske tirkegen. Sondaı-aq, tergeý jumystary olardyń jeke qarym-qatynastaryna baılanysty qastandyq áreketin anyqtaǵan.

«Anyǵy, qylmysker qastandyq áreketine óte tyńǵylyqty daıyndalǵan. Serik Baıbatyrovtyń júretin jol baǵyty men jumys ýaqytyna deıin jaqsy bilgen. Qaskóı qylmys jasaýǵa kúndizgi ýaqytty beker tańdamaǵan tárizdi. Sebebi kólik keptelegi kezinde ol ońaı iz jasyryp ketýine senimi kámil bolǵan. Qazirgi ýaqytta Soltústik Qazaqstan oblysynyń turǵyny bolyp tabylatyn kúdikti azamat Almatyǵa óz kóligimen 20 tamyzda jolǵa shyqqan. Qarasaı aýdany tusynan qalaǵa engen», - dedi Salatanat Ázirbek. Onyń aıtýynsha, kúdiktige izdeý jarııalandy. Kisi ólimine baǵyttalǵan qastandyq áreketi boıynsha qylmystyq is qozǵaldy.