Qazaqstannyń áskerı parashıýtshileri Shveıtsarııada ótken álem chempıonatynda qola medalǵa qol jetkizdi
ASTANA. Shildeniń 28-i. QazAqparat - Qazaqstan Qarýly Kúshteri Áýe Qorǵanysy Kúshteriniń sporttyq parashıýtshiler komandasy parashıýt sporty boıynsha álem chempıonatynyń qola medaline ıe boldy, sondaı-aq Azııa men Muhıt araldary HІІІ chempıonatynda birinshi oryndy aldy, dep habarlaıdy QR Qorǵanys mınıstrliginiń baspasóz qyzmeti.
Qazaqstandyq parashıýtshiler komandasy Azııa jáne Muhıt araldary chempıonatynan 12 kýbok, 18 medal alyp keldi, onyń ishinde 10 altyn, 1 kúmis jáne 7 qola medal bar.
Azııa jáne Muhıt araldary chempıonaty Indonezııanyń Solo qalasynda ótti. Oǵan jeti memlekettiń komandalary qatysty. Sportshylar parashıýtpen sekirýdiń úsh túrinen synǵa túsken. Onyń ishinde toptyq jáne jeke esepte belgilengen núktege dál qoný, sondaı-aq parashıýttik akrobatıka boıynsha óner kórsetti. Synnyń úsheýine qatysqan qazaqstandyqtar júldeden quralaqan qalmady.
Erler komandasynda óner kórsetken ıÝrıı Sabad, Valentın Valıavın, Igor Shtol, Vıacheslav Lı jáne Sergeı Joldın toptyq dáldikte keremet jetistikterge qol jetkize aldy. Sonyń arqasynda Qazaqstandyq sportshylar top jaryp, birinshi júldeli orynǵa shyqty. Komanda eki kýbok jáne 5 altyn medalmen marapattaldy.
Qyzdar komandasy da erlerden qalysqan joq. Parashıýtshiler Anna Antsýpova, Olga Fedorenko, Natalıa Nıkolaeva, Bıbigúl Ramazanova jáne Aleksandra Larına sheberlikterin asyryp, 1-shi oryndy ıelendi.
