Qazaqstannyń áskerı oqý oryndaryna túsýge 1500-den astam talapker qujat tapsyrdy

ASTANA. QazAqparat - Qazaqstannyń orta jáne arnaýly orta oqý ornyn bitirgen 1 564 túlek ózderiniń Qazaqstan Qarýly Kúshteriniń ofıtserleri bolý armanyn júzege asyrý úshin alǵashqy qadamyn jasady. Olardyń ishinde 1 065 jas biryńǵaı ulttyq test tapsyryp, 499-y keshendi testileýge daıyndalýda. Bir aptadan soń 50-den jáne odan joǵary ball jınaǵan barlyq jasóspirimder ózderi tańdaǵan elimizdiń túrli óńirlerindegi áskerı oqý oryndaryna jiberiledi.

Bul týraly QR QM baspasóz qyzmeti habarlady.

Elimizdegi áskerı oqý oryndardyń kýrsanty ataný úshin olar bes kezeńnen turatyn synaqtan sátti ótýi tıis. Bastapqyda - aldyn-ala kásibı-psıhologııalyq irikteýden, dene daıarlyǵy boıynsha normatıvter tapsyrýdan, sonymen qosa medıtsınalyq kýálandyrýdan, jas jaýyngerdiń kýrsy jáne kásibı-psıhologııalyq irikteýden, al qorytyndysynda - fakýltetter boıynsha konkýrstyq irikteýden ótedi.

Ár kezeńnen ótý úshin bir ǵana múmkindik beriledi. Elimizde bakalavrıat baǵdarlamasy boıynsha úsh joǵarǵy áskerı oqý orny áskerı kadrlardy daıarlaýdy júzege asyrady. Atap aıtsaq, Qurlyq áskerleri áskerı ınstıtýty, Radıoelektronıka jáne baılanys áskerı ınstıýty, eki márte Keńes Odaǵynyń batyry T.Begeldınov atyndaǵy Áýe qorǵanysy kúshteri áskerı ınstıtýty.

Bıyl qabyldaý erejesi ózgerdi. Endi talapkerler mamandyqty testileýden bólek fızıka, geografııa, hımııa, bıologııa nemese dúnıejúzilik tarıhty tańdaýy múmkin. Sonymen qatar qujattardy rásimdeý jeńildetilip, olardy qabyldaý merzimi ózgertildi. Joǵarǵy áskerı oqý oryndary men QR QM Kadet korpýsy - ústimizdegi jyldyń 20 shildesine deıin, respýblıkalyq áskerı mektepter - 15 tamyzǵa deıin qabyldaıdy. Іriktelgen úmitkerlerdi esepke alý 21 tamyzǵa deıin júrgiziledi.