Qazaqstannyń áskerı medıtsına qyzmetkerleri jedel medıtsınalyq qyzmet kórsetýdi úırenip jatyr

ALMATY. QazAqparat - Almaty qalasynda ornalasqan QR Qorǵanys mınıstrligine qarasty Áskerı medıtsına ortalyǵynyń bazasynda 300-den astam adam halyqaralyq kýrs boıynsha sertıfıkattalǵan «Jaraqat kezinde shuǵyl medıtsınalyq kómek kórsetý» (International trauma life support) kezekti biliktilikti arttyrý kýrsyn aıaqtady.

Bul týraly QazAqparat QR Qorǵanys mınıstrliginiń baspasóz qyzmetine silteme jasap habarlaıdy.

Atalmysh ortalyq TMD aýmaǵynda atalǵan baǵdarlama negizinde sertıfıkattalǵan alǵashqy áskerı-medıtsınalyq mekeme. 2019 jyly ortalyq halyqaralyq sertıfıkattaýdan ótip, Jaraqat alǵan kezde alǵashqy medıtsınalyq kómek kórsetý halyqaralyq uıymynyń (AQSh) táýelsiz fılıaly mártebesin ıelendi.

Kýrstar jyl saıyn AQSh Qorǵanys mınıstrligimen 2017-2022 jyldarǵa arnalǵan besjyldyq yntymaqtastyq josparyna sáıkes ótkiziledi. Oqý barysyna qajetti kórneki oqytý quraldar, manekender, aqparattyq jáne shyǵyn materıaldary alyndy. Nusqaýshylardyń jeke sabaq berýine quqyǵy bar halyqaralyq sertıfıkattary bar.

Qazaqstan Qorǵanys mınıstrliginiń Áskerı medıtsına ortalyǵy dárigerlik quramnyń, orta medıtsınalyq personaldyń biliktiligin arttyrý men kýrstyq daıyndyq jónindegi qosymsha bilim baǵdarlamalaryn iske asyratynyn atap ótý qajet. Jyl saıyn oqý mekemesiniń ózinde de, kóshpeli tsıkl kezinde de 900-ge jýyq Qarýly Kúshterdiń, Shekara qyzmetiniń jáne Ulttyq ulannyń áskerı qyzmetshileri men azamattyq personal tyńdaýshylar bilim alady.