Qazaqstannyń áskerı qyzmetshileri BUU medaldarymen nagradtaldy
ASTANA. QazAqparat - QR Otan qorǵaýshy kúni qarsańynda áskerı baqylaýshylarǵa qoıylatyn talaptardy minsiz jáne úlgili atqarǵan qazaqstandyq áskerı qyzmetshiler BUU medaldarymen nagradtaldy.
Bul týraly QR Qorǵanys mınıstrliginiń baspasóz qyzmeti habarlady.
«BUU-nyń Batys Saharadaǵy (MINURSO) referendýmdy ótkizý kezindegi beıbitshilik pen qaýipsizdikti qoldaý jónindegi bitimgershilik mıssııasyn oryndaý barysynda qazaqstandyq ofıtserler kapıtan Baqtııar Aqbalaev pen kapıtan Temirlan Músápirov BUU medaldarymen nagradtaldy», -delingen habarlamada.
Esterińizge sala ketsek, 2014 jyldyń shildesinen bastap qazirgi ýaqytqa deıin «QAZBRIG» qazaqstandyq bitimgershilik brıgadasynyń 4 ofıtseri Batys Saharadaǵy referendýmdy ótkizý kezindegi beıbitshilik pen qaýipsizdikti qoldaý jónindegi BUU mıssııasynda baqylaýshylar retinde qyzmet atqarýda. Budan basqa Qazaqstan Respýblıkasy Qarýly Kúshteriniń 2 ofıtseri aǵymdaǵy jyldyń naýryzynan bastap Kot-d'Ivýardaǵy BUU bitimgershilik mıssııasynda (UNOCI) áskerı baqylaýshy.
Sondaı-aq QR Qarýly Kúshteri quramynan BUU bitimgershilik mıssııalarynyń áskerı baqylaýshylary retinde 20 áskerı qyzmetshi iriktelip, Gaıtde, Batys Saharada, Kot-d'Ivýarda jáne Lıberııada qyzmet ótkerýge daıarlandy.
Qazirgi ýaqytta Batys Saharadaǵy (MINURSO) BUU bitimgerlik mıssııasyna «Qazbat» qazaqstandyq bitimgershilik batalonynan bir ofıtserdi áskerı baqylaýshy retinde jiberý jónindegi jumystar júrgizilýde.
