Qazaqstannyń áskerı kemesi Ázerbaıjannyń sý aıdynyna joryqqa shyqty

NUR-SULTAN. QazAqparat – Qazaqstan Áskerı-teńiz kúshteri «Mańǵystaý» zymyran-artıllerııalyq kemesiniń ekıpajy «Teńiz kýbogy-2019» halyqaralyq baıqaýy sheńberinde Kaspıı teńiziniń sý aıdynynda Ázerbaıjan ÁTK jaýyngerlik daıarlyq polıgondaryna shtýrmandyq tanystyrylym joryǵyna shyqty, dep habarlaıdy QR Qorǵanys mınıstrliginiń baspasóz qyzmeti.

Áskerı teńizshiler kórsetilgen aýdanda baıqaý kezeńderiniń oryndalýyn eseptep, reıdtik jabdyqtyń ornatylýyn, navıgatsııalyq qorshaýlardy tekserdi, oq atýǵa arnalǵan nysanalardy qarap shyqty. Keme ekıpajy baıqaýdyń negizgi epızodtary boıynsha teńizdegi alǵashqy jattyǵýyn ótkizdi.

«Teńiz kýbogy – 2019» - bul Armııalyq halyqaralyq oıyndar baǵdarlamasy baıqaýlarynyń biri. Saıys 5-15 tamyz aralyǵynda Ázerbaıjan ÁTK «Pýta» áskerı-teńiz bazasynda ótedi. Áskerı teńizshilerge teńiz jáne áýe nysynalaryna dál tıgize otyryp, oq atýda ózderiniń sheberlikteri men dáldikterin kórsetýge týra keledi.

Sondaı-aq, jekeleı kezeńde kemeni zákirge jáne arqanǵa baılanatyn bóshkege qoıý, teńizshilerdiń qutqarý daıyndyǵy, kemeniń tózimdiligine kúresý jarystary bolady.

Saıysqa barlyǵy tórt eldiń, ıaǵnı, Ázerbaıjan Respýblıkasy, Iran Islam Respýblıkasy, Qazaqstan Respýblıkasy jáne Reseı Federatsııasynyń komandalary qatysady.