Qazaqstannyń áskerı-áýe kúshteriniń ekıpajdary «Avıadarts-2015» baıqaýyna daıyndyq ústinde (FOTO)

ASTANA. QazAqparat - 2015 jyldyń 26 shildesi men 16 tamyzy aralyǵynda Reseı Federatsııasyna qarasty Lıpetsk jáne Rıazan qalalarynyń áskerı áýeaılaqtarynda ótetin «Avıadarts-2015» ushqysh ekıpajdardyń halyqaralyq baıqaýyna qazaqstandyq avıatsııalyq bazanyń daıarlyǵy aıaqtalýǵa jaqyn qaldy, dep habarlaıdy QR QM baspasóz qyzmeti.

«Qazaqstandyq ushqyshtar alǵash ret osy halyqaralyq baıqaýǵa qatysqaly otyr, biz Qazaqstandy laıyqty deńgeıde kórsetý úshin bar kúsh-jigerimizdi salamyz. Ushqyshtardyń kóńil-kúıi sergek, júldeli oryn alýǵa úmittimiz. Avıatorlardyń daıarlyǵy barysynda juptasqan áýe pılotajdary, áýe jolynyń ashylýy, maqsatty anyqtaý jáne jeńý pysyqtaldy», - dedi Shymkent qalasyna qarasty 55652 áskerı bóliminiń tárbıe jáne áleýmettik-quqyqtyq jumystar jónindegi komandırdiń orynbasary podpolkovnık Jandos Nurymbetov.

Ushý ekıpajdaryn irikteý bir aı buryn bastalǵan bolatyn. Qazaqstandyq Áskerı-áýe kúshteriniń atynan Halyqaralyq baıqaýda MıG-29, Sý-25, Sý-27 jáne Mı-8 ushaqtary men tikushaqtarynyń ekıpajdary qatysady. Ushý quramy baıqaýǵa belsendi daıarlyq ústinde. Áýeaılaqtarda ınjenerlik-tehnıkalyq quram jáne jer ústi ushýlaryn qamtamasyz etetin mamandar tolyq daıarlyqtan ótti. Ushaqtar men tikushaqtardyń qozǵaltqyshtary men apparatýralary kún saıyn tekserýden ótedi. Baıqaýda ushaqtar men tikushaqtar ekıpajdaryúshin ushý tapsyrmasy boıynsha kózben sholatyn áýe barlaýy baǵytymen, aımaqqa, jaı pılotaj jáne kishi bıiktikte juptasyp ushatyn bolady.

Baıqaýdyń maqsaty áýe jolynda jer ústi obektilerin izdestirýdi jáne jup quramynda jaı pılotajdyń keskinin oryndaýda ushý ekıpajdarynyń daǵdylaryn baǵalaý bolyp tabylady. Barlyq ushýlar qolaıly meteorologııalyq jaǵdaıda iske asyrylady.