Qazaqstannyń ardagerleri prezıdenttik saılaýdyń qorytyndysyn tolyǵymen qoldaıdy

Búgin Astanada ótken baspasóz máslıhatynda «Qazaqstan Respýblıkasynyń ardagerler uıymdary» qoǵamdyq uıymynyń Ortalyq keńes tóraǵasy Qaıyrbek Súleımenov osyndaı málimdeme jasady.

«Táýelsiz Qazaqstannyń 20 jyldyq ómiri Nursultan Nazarbaevpen tikeleı baılanysty. Osy ýaqyttyń ishinde ol syndarly 90-jyldardyń basynda bolǵan qıynshylyqtarǵa qaramastan, óz halqyn damýdyń dańǵyl jolyna shyǵara bildi. Keńes Odaǵy ydyraǵan jyldary barlyq memleketterde óndiristik oryndar toqtap, azyq-túlik pen elektrenergııa tapshylyǵy oryn aldy. Burynǵy odaqtas elderde ultaralyq shıelenister órship, jappaı turaqsyzdyq ornady. Mine, osyndaı syndarly ýaqytta Nursultan Nazarbaev tarıhı sheshimder qabyldap, Qazaqstandy áleýmettik-ekonomıkalyq tyǵyryqtan shyǵara bildi. Biz, elimizdiń aǵa býyn ókilderi, Qazaqstan atty ortaq úıimizdegi beıbitshilik pen kelisimdi baǵalaımyz. Ol úshin Nursultan Nazarbaevqa shyn rızashylyǵymyzdy bildiremiz. Biz N.Nazarbaevty saılaýdaǵy jeńisimen quttyqtaı otyryp, bizdiń uıymǵa múshe 1 mln. 700 myń jannyń atynan prezıdenttik saılaýdyń qorytyndysyn tolyǵymen qoldaıtynymyzdy jetkizemiz», - dedi óz sózinde Q.Súleımenov.