Qazaqstannyń ardagerler jáne áskerı-patrıottyq birlestikteri Elbasynyń prezıdenttik ókilettiligin 2020 jylǵa deıin uzartýdy qoldaıdy
ATY. 30 jeltoqsan. QazAqparat /Erbol Azanbek/ - Qazaqstannyń ardagerler jáne áskerı-patrıottyq birlestikteri Elbasy N.Nazarbaevtyń prezıdenttik ókilettigin 2020 jylǵy 6 jeltoqsanǵa deıin uzartý jónindegi yntaly toptyń bastamasyn qoldaıdy.
Bul týraly keshe Almatyda «Nur Otan» HDP fılıalynda ótken partııa janyndaǵy ardagerler jáne áskerı-patrıottyq birlestikteri qoǵamdyq keńesiniń kezekten tys otyrysy barysynda aıtyldy. Partııa músheleri, memleket jáne saıası qaıratkerler, Uly Otan soǵysy men jaýynger-ınternatsıonalısteriniń ardagerler qoǵamdyq uıymdarynyń basshylary, Chernobyl AES-indegi apatty joıýǵa qatysýshylary bas qosqan otyrys barysynda N.Nazarbaevtyń prezıdenttik ókilettiligin uzartý jónindegi bastamaǵa biraýyzdan qoldaý bildirildi.
Esterińizge sala keteıik, 2010 jylǵy jeltoqsannyń 22-23 kúnderi Astana qalasynda Qazaqstannyń ardagerler jáne áskerı-patrıottyq birlestikteriniń Respýblıkalyq forýmy ótip, onda «Nur Otan» HDP janynan osy atalǵan keńes qurylǵan bolatyn. Keńestiń qyzmeti azamattardyń boıynda patrıotızm, óz eliniń mádenıetin, tarıhyn, dástúrin qurmetteýdi qalyptastyryp, jastar men óskeleń urpaqty Otanyn súıý jáne ony qorǵaýda tárbıeleý maqsatynda «Nur Otan» Halyqtyq Demokratııalyq partııasy men ardagerlerdiń qoǵamdyq uıymdaryn biriktirip, nyǵaıtýǵa, sondaı-aq Uly Otan soǵysynyń, Aýǵan soǵysy jáne jergilikti janjaldardyń qatysýshylary, Chernobyl AES apatyn joıýǵa qatysýshylarynyń memlekettik qoldaý deńgeıin kóterýge baǵyttalǵan.
