Qazaqstannyń árbir azamaty el Konstıtýtsııasyn bilýge, syılaýǵa mindetti - S. Tursynov

STANA. Qyrkúıektiń 3-i. QazAqparat /Jasulan Amanbaıuly/ - Qazaq gýmanıtarlyq-zań ýnıversıtetinde QR Prezıdenti janyndaǵy Adam quqyqtary jónindegi komıssııa músheleri ýnıversıtet stýdentterimen jáne ustazdarymen QR Konstıtýtsııasynyń 15 jyldyǵyna arnalǵan kezdesý ótkizdi,

dep habarlaıdy QazAqparat.

Jıynda komıssııa tóraǵasy Saǵynbek Tursynov ýnıversıtet stýdentteri aldynda Konstıtýtsııanyń negizgi mindeti men mańyzyna qatysty baıandama jasady. Sondaı-aq komıssııa músheleriniń adam quqyqtary salasynda daıyndalǵan eńbekteri men baıandamalar jınaǵyn tabys etti.

«Konstıtýtsııany qabyldaý arqyly Qazaqstan ekonomıkalyq-saıası bostandyǵyna qol jetkizip, osy egemendik jyldary ishinde elimizde beıbitshilik pen túsinistik ornap keldi. Ultymyzdyń kóshbasshysy, Qazaqstan Respýblıkasynyń Tuńǵysh Prezıdenti jasaqtaǵan Konstıtýtsııalyq modelimizdiń durystyǵyn taǵy bir dáleldeı tústi», deıdi S.Tursynov.

Kezdesý barysynda komıssııa músheligine kiretin Joǵarǵy sot sýdıalary, Parlament depýtattary, halyqaralyq uıym ókilderi baıandama jasap, el Konstıtýtsııasynyń negizgi qaǵıdattaryna keń túsinikteme berdi.

«Ózin syılaı biletin árbir azamat, sonyń ishinde stýdent, onyń áleýmettik dárejesine, ál-aýqatyna qaramastan, Konstıtýtsııany bilýge, syılaýǵa mindetti. Memlekettik qyzmetkerler men quqyq qorǵaý organdary úshin Konstıtýtsııa árdaıym aldynda turatyn kitapqa aınalýy shart», dep atap kórsetti komıssııa tóraǵasy.

Zań fakýltetinde tálim alatyn birneshe stýdent adam quqyqtaryn qorǵaýdyń halyqaralyq jáne ulttyq tetikterin jalpyǵa tanylǵan álemdik standarttarǵa sáıkes jetildirý, quqyq qorǵaý organdarynyń jumysyn jetildirý, adamnyń konstıtýtsııalyq quqyqtaryn sotta jáne sottan tys ınstıtýttarda qorǵaýdyń ózekti máselelerine arnalǵan taqyryptar boıynsha baıandamalar jasady.