Qazaqstannyń árbir aımaǵynyń ataýy qaıdan shyqqanyn zertteý kerek - Prezıdent

ASTANA. QazAqparat - Qazaqstannyń kıeli jerleri jas urpaqty otansúıgishtikke tárbıeleıdi. Bul týraly Memleket basshysy Nursultan Nazarbaev «Habar» telearnasyna bergen suhbatynda málim etti, dep habarlaıdy QazAqparat.

«Baǵdarlamada «Týǵan jer» jobasy qamtylǵan. Eger de biz Qazaqstannyń árbir saı-salasynyń, taýynyń, jolynyń, ózenderi men kólderiniń ataýlary qaıdan shyqqanyn zerttep jazatyn bolsaq, onda qazaqtyń tarıhy eshqashan óshpeıdi. Otanyn súıý degen kezde eń aldymen adamnyń oıyna ata-anasy, týǵan jeri keledi. Biz qansha jasqa kelsek te, balalyq shaqtaǵy kezder, sol ýaqytta júrgen jerler kóz aldyńnan ketpeıdi jáne kóńilge jylylyq uıalatady. Sondyqtan «Týǵan jer» sııaqty jobalarǵa nemquraıly qaramaý kerek. Týǵan jerdiń topyraǵy, árbir ósimdigi, jan-janýar dúnıesi biz úshin óte qymbat. Otandy, eldi súıý osydan bastalady. Sondyqtan jas urpaqty osyndaı jaǵdaıda tárbıelesek dep oılaımyn. Qazirgi kezde bul jumystar barlyq jerde júrgizilip jatyr»,-dep toqtaldy Prezıdent.

Budan bólek Elbasy Qazaqstannyń kıeli jerleriniń geografııasy jobasyna toqtala kele, osy rette elimiz aýmaǵynda dúnıejúzine kórsetin kıeli jerler barshylyq ekenin atap ótti. Bul baǵyttaǵy qadamdar týrızmdi damytýǵa aıryqsha úlesin qosady.

N. Nazarbaev osy kúnge deıin Qazaqstannyń barlyq túkpirinde, atap aıtqanda óńirlerdegi aýdandar men aýyldarda bolǵanyn eske saldy.

Sondaı-aq Prezıdent álemdegi kórikti jerlerdi aralap shyqqanyn aıta kele, «Men qazir demalysqa eshqaıda barǵym kelmeıdi. Qazir Býrabaıda otyrmyz. Bundaı keremet jerdi kezdestire bermeısiń, ıaǵnı tabıǵaty saqtalǵan ádemi jer. Taýy da, kóli de bar. Dál osyndaı oryndar Shyǵys Qazaqstanda bar, adamnyń aıaǵy baspaǵan jerler kezdesedi. Alataýdyń baýraıy óz aldynda bólek»,-dedi.

«Sondyqtan bizdiń kıeli jerlerimiz boıynsha qajetti jumystar atqarylyp jatyr. Bul óte kerek, sebebi osynyń barlyǵy otansúıgishtikke, óz Otanyn bilýge qajet»,-dedi Memleket basshysy.