Qazaqstannyń Arab elderi jónindegi zertteýshileri BAÁ-ge shaqyryldy
E.Ábil jumys saparymen Anýar Gargash Dıplomatııalyq akademııasyna (AGDA) jáne Mýhammed Bın Rashıd Memlekettik basqarý mektebine (MBRSG) bardy.
Alǵashqy kezdesý Anýar Gargash Dıplomatııalyq akademııasynyń bas dırektory Nıkolaı Mladenovpen ótti. Onyń barysynda yntymaqtastyqtyń negizgi baǵyttary, atap aıtqanda, dıplomatııa jáne memlekettik basqarý salasynda birlesken zertteýler júrgizý, oqytýshylyq qurammen almasý jáne bilim alýshylarǵa arnalǵan taǵylymdama uıymdastyrý, memlekettik qyzmetshilerdiń biliktiligin arttyrý salasynda tájirıbe almasý máseleleri talqylandy.
Anvar Gargash Dıplomatııalyq akademııasy Parsy shyǵanaǵyndaǵy Arab elderi jóninde zertteý júrgizetin qazaqstandyq zertteýshilerdi Birikken Arab Ámirlikterine, al Ortalyq Azııa elderine qyzyǵýshylyǵy bar óz akademııasynyń professorlaryn Qazaqstanǵa jiberýdi usyndy.
Esterińizge sala keteıik, 2023 jyldyń qańtar aıynda Memleket basshysynyń BAÁ-ge resmı sapary barysynda eki oqý orny arasynda yntymaqtastyq týraly memorandýmǵa qol qoıylǵan edi.
Akademııa rektorynyń sapary barysyndaǵy ekinshi kezdesýi Mýhammed Bın Rashıd mektebiniń Prezıdenti Alı Al Marrımen ótti.
«Mýhammed Bın Rashıd mektebiniń basshysymen «Public Administration», «Public Policy» magıstrlik baǵdarlamalary boıynsha qos dıplomdyq ortaq baǵdarlama ashý, bilim alýshylar men professorlyq quram arasynda akademııalyq almasý baǵdarlamalaryn uıymdastyrý, ortaq zertteýler júrgizý, sondaı-aq memlekettik qyzmetshilerdiń biliktiligin arttyrý baǵytyndaǵy taǵylymdamalardy uıymdastyrý máselelerin talqyladyq», – dedi Erlan Ábil.
Kezdesýler sońynda Anvar Gargash Dıplomatııalyq akademııasy jáne Mýhammed Bın Rashıd mektebi basshylyǵy Akademııanyń uıymdastyrýymen 2023 jyldyń 27-28 sáýirinde ótetin jyl saıynǵy halyqaralyq ǵylymı konferentsııaǵa shaqyryldy.
