Qazaqstannyń altynvalıýta qory qansha

NUR-SULTAN. QazAqparat – Tamyzda Qazaqstannyń halyqaralyq rezervteri 382 mln dollarǵa ósip, 86,5 mlrd dollardy quraǵan. Bul týraly Ulttyq bank tóraǵasynyń orynbasary Aqyljan Baımaǵambetov Úkimet otyrysynda aıtty, dep habarlaıdy QazAqparat tilshisi.

«Jalpy halyqaralyq rezervter tamyz aıynda 382 mln dollarǵa ósip, 86,5 mlrd dollardy qurady. Onyń ishinde Ulttyq banktiń altynvalıýta aktıvteri – 32,7 mlrd dollardy, Ulttyq qordyń aktıvteri – 53,8 mlrd dollardy qurady.

Respýblıkalyq bıýdjetke 3,3 trln teńge transfertter bólý úshin jyl basynan bastap Ulttyq qordyń valıýtalyq aktıvteri 3,3 mlrd dollarǵa satyldy. Teńgemen túsken túsimder de paıdalanyldy. Munaı baǵasynyń edáýir ósýi aıasynda Ulttyq qorǵa túsimder jyl basynan beri shamamen 3,3 esege ulǵaıyp, 4,6 trln teńge boldy», - dedi ol.

Onyń aıtýynsha, Ulttyq qordyń ortasha jyldyq kirisi qurylǵan kezden beri tuńǵysh ret 3,05%-ǵa jetip otyr.

«Sońǵy 5 jáne 10 jylda bul kórsetkish jyldyq mánde 1,29% jáne 1,39% bolǵan edi», - dedi Ulttyq bank tóraǵasynyń orynbasary.