Qazaqstannyń altyn-valıýtalyq qorynda altynnyń úlesi artty
ASTANA. QazAqparat - Bıylǵy jyly QR altyn-valıýtalyq qory 42 % quraıdy. Byltyr bul kórsetkish 37 % deńgeıinde bolǵan. Valıýtalyq aktıvterdiń úlesi ótken jylǵy 63%-dan 58% deıin tómendedi, dep habarlaıdy QazAqparat tilshisi Finprom.kz-ke silteme jasap.
Sondaı-aq, Qazaqstannyń halyqaralyq qorlary 2018 jyldyń tamyz aıynyń sońyna 30,7 mlrd AQSh dollaryn qurady. Bul ótken jylǵy 32,6 mlrd teńgeden 5,7% tómen. Tamyz aıynyń qorytyndylaryna sáıkes, kórsetkishtiń dál osylaı tómendeýi sońǵy 5 jylda alǵash ret baıqalǵan. Qorlardyń ósý qarqyny 2013-2018 jyldardaǵy ortasha eseppen alǵanda jylyna 1% quraıdy, al qarjylaı balamadaǵy ósim deńgeıi sońǵy 5 jylda 1,2 AQSh dollaryna jetken. Taza halyqaralyq qorlardyń úlesi 98,4% nemese 30,3 mlrd AQSh dollaryna jetti.
Qorlar qurylymynda erkin aıyrbastalatyn valıýtadaǵy aktıvterdiń negizgi úlesi - 58,3% nemese 18 mlrd AQSh dollary. Bir jyl buryn bul kórsetkish 20,7 mlrd AQSh dollary deńgeıinde bolǵan. Altynnyń qory 41,7% nemese 12,8 mlrd AQSh dollary (bir jyl buryn - 12 mlrd) boldy.
2016 jyldan bastap altyn qorynyń menshikti salmaǵy erkin aıyrbastalatyn valıýta aktıvterine qatysty óse bastaǵan. Mysaly, 2013 jyly olardyń ózara salmaǵy 81,2%-ǵa 18,8% qurasa, tamyz aıynda 63,3%-ǵa 36,7 % boldy.
QR Ulttyq qorynyń aktıvteri esebimen altyn-valıýtalyq qory ústimizdegi jyldyń tamyz aıynyń sońyna 87,3 mlrd AQSh dollaryn qurady. Bul ótken jylǵy 90,6 mlrd AQSh dollarymen salystyrǵanda 3,6% tómen.
