Qazaqstannyń altyn-valıýta rezervi 2,4 mlrd dollarǵa artty
NUR-SULTAN. QazAqparat – Qazaqstannyń altyn-valıýta rezervteri 2,4 mlrd dollarǵa artty. Bul týraly QR Ulttyq bank tóraǵasy Erbolat Dosaev búgingi Úkimet otyrysynda málim etti, dep habarlaıdy QazAqparat tilshisi.
«Aldyn ala derekter boıynsha bıylǵy shildeniń sońynda halyqaralyq jalpy rezervter 3,2 paıyzǵa ulǵaıyp, 93,5 mlrd AQSh dollaryn qurady. Shilde aıynda Ulttyq banktiń altyn-valıýta rezervteri, eń aldymen, altyn baǵasynyń ósýine baılanysty 35,3 mlrd AQSh dollaryna deıin 7,3 paıyzǵa nemese 2,4 mlrd AQSh dollaryna artty», - dedi UB basshysy.
Onyń sózine qaraǵanda, Ulttyq qordyń aktıvteri bıylǵy shildede 1,6 mlrd AQSh dollary somasynda alǵan ınvestıtsııalyq kiris esebinen bir aıda 0,5 mlrd AQSh dollaryna (+0,9%) ulǵaıyp, 58,2 mlrd AQSh dollaryn qurady. Bul rette kepildi transfert bólý maqsatynda Ulttyq qordyń aktıvterin 1,1 mlrd AQSh dollaryna konvertatsııalaý júzege asyryldy.
