Qazaqstannyń altyn-valıýta qorynyń kólemi qansha

NUR-SULTAN. QazAqparat – Qańtarda Qazaqstannyń altyn-valıýta rezervi 35,6 mlrd dollardy qurady. Bul týraly búgin Úkimet otyrysynda QR Ulttyq bank tóraǵasy Erbolat Dosaev aıtty, dep habarlaıdy QazAqparat tilshisi.

«Altyn-valıýta rezervteri ózgermeı, bıylǵy qańtardyń sońynda aldyn ala derekter boıynsha 35,6 mlrd AQSh dollary boldy. Altyn baǵasynyń tómendeýi nátıjesinde altyn portfeliniń tómendeýi erkin konvertatsııalanatyn valıýtadaǵy aktıvterdiń ósýimen teńestirildi», - dedi Erbolat Dosaev.

Onyń aıtýynsha, shetel valıýtasyndaǵy aktıvter memlekettik qaryzdy tóleýmen, sondaı-aq ekinshi deńgeıdegi bir banktiń 500 mln AQSh dollaryna valıýtalyq oblıgatsııalaryn óteý mindettemelerin oryndaýyna baılanysty Qazaqstan Ulttyq bankindegi shottardan ekinshi deńgeıdegi bankter qarajatynyń áketilýimen ishinara rettelgen Azııa damý banki qaryzynan qarajattyń kelýi esebinen ósti.

«Jalpy halyqaralyq rezervter jyl basynan bastap 1 mlrd AQSh dollaryna tómendep, 93,3 mlrd AQSh dollaryn qurady», - dedi Ulttyq bank tóraǵasy.